Një fluturim i Air Serbia-s nga Beogradi drejt Moskës është ndërprerë papritur të martën në mbrëmje, pasi avioni është detyruar të kthehet në aeroportin “Nikola Tesla”, në rrethana që ende nuk janë sqaruar zyrtarisht. Ngjarja ka nxitur reagime dhe spekulime në Serbi, pasi në mesin e pasagjerëve të dyshuar përmenden edhe disa figura të njohura politike, përfshirë Aleksandar Vulin.
Sipas raportimeve të mediave serbe, në avion dyshohet se ndodheshin Vulin, një nga politikanët më të afërt me Moskën, drejtori i Srbijagas-it, Dušan Bajatović, si dhe politikani Nenad Popović.
Televizioni N1, duke iu referuar portalit Nova.rs, raportoi se bëhej fjalë për avionin Airbus A320, me numër fluturimi JU134, i cili ishte nisur nga Beogradi në orën 18:25, me destinacion Moskën.
Megjithatë, gjatë rrugës avioni ka ndryshuar drejtimin dhe është kthyer në Beograd, ku ka aterruar pak para orës 22:00.
Burime të Nova.rs pretendojnë se urdhri për kthimin e avionit ishte dhënë nga drejtori i sigurisë korporative të aeroportit, për arsye që dyshohet se lidhen me sigurinë. Deri më tani, ky informacion nuk është konfirmuar zyrtarisht.
Ajo që e ka shtuar interesimin për këtë rast është fakti se disa orë para nisjes së fluturimit, kryetari i Partisë Demokratike të Serbisë, Srđan Milivojević, kishte paralajmëruar publikisht një udhëtim të mundshëm drejt Moskës të dy zyrtarëve serbë.
“Dhe kush po arratiset sonte drejt Moskës, me fluturimin e orës 18:30?”, kishte shkruar ai në rrjetin social X.
Në një deklaratë të mëhershme për median serbe Naš Portal, Milivojević kishte pretenduar se dy politikanë po udhëtonin drejt Moskës, duke theksuar se njëri kishte blerë biletë vajtje-ardhje, ndërsa tjetri vetëm vajtje.
Sipas tij, personi që kishte blerë biletë vetëm vajtje ishte një ish-ministër, i njohur për qëndrimet kundër integrimit evropian, ndaj të cilit, sipas pretendimit të tij, kishte nisur një hetim.
“Sepse ka filluar një hetim kundër atij njeriu që po arratiset”, kishte deklaruar Milivojević.
Më pas, mediat malazeze, përfshirë portalin ETV, i identifikuan dy politikanët si Aleksandar Vulin dhe Nenad Popović, duke raportuar se ata kishin rezervuar bileta për fluturimin e mbrëmjes drejt Moskës.
Ndërkohë, gazeta serbe Republika ka raportuar për dyshime lidhur me keqpërdorime financiare në vlerë prej rreth 60 milionë eurosh në një institucion të Vojvodinës, çështje të cilën e ka ndërlidhur edhe me emrin e Vulinit. Megjithatë, pretendimet për përfshirjen e tij dhe gjendjen e hetimeve nuk janë konfirmuar zyrtarisht.
Aleksandar Vulin, ish-ministër i Mbrojtjes, ish-ministër i Brendshëm dhe ish-drejtor i Agjencisë së Inteligjencës së Sigurisë së Serbisë (BIA), njihet për qëndrimet e tij pro-ruse dhe raportet e afërta politike me Moskën.
Edhe Dušan Bajatović dhe Nenad Popović njihen për lidhjet e tyre me Rusinë.
N1 ka bërë të ditur se ka kërkuar sqarime nga kompania Air Serbia, aeroporti “Nikola Tesla” dhe Drejtoria e Aviacionit Civil, por deri në publikimin e raportimit nuk kishte marrë përgjigje. Televizioni ka tentuar gjithashtu të kontaktojë Vulinin dhe Bajatovićin, por pa sukses.
Për momentin, mbetet e paqartë nëse kthimi i avionit ka pasur lidhje me pasagjerët e dyshuar apo me ndonjë çështje tjetër të sigurisë. Po ashtu, nuk ka konfirmim zyrtar se Vulin ndodhej në bord apo se udhëtimi drejt Moskës kishte për qëllim shmangien e një hetimi të mundshëm.
Kështu, paralajmërimi i opozitarit para nisjes së avionit, raportimet për biletën vetëm vajtje dhe kthimi i papritur i fluturimit kanë ngritur pikëpyetje, të cilave ende nuk u është dhënë një përgjigje zyrtare.
Sinjali – aty ku e vërteta flet para lajmit!
Burimi: Sinjali
