Arrestimi i Baftije Fekës, e cila kërkohej nga Policia e Kosovës në kuadër të operacionit antidrogë “Heshtja”, është konfirmuar. Ajo është personi i gjashtë i arrestuar në këtë rast, pas aksionit gjatë të cilit u sekuestruan rreth 1.6 kilogramë kokainë, vetura luksoze dhe mijëra euro para të gatshme.
Gazeta Sinjali raportoi ekskluzivisht më herët se Baftije Feka ishte në kërkim të Policisë, duke zbuluar edhe identitetin e saj si e dyshuar në këtë rast.
Sipas raportimit të Sinjalit, në kuadër të këtij operacioni ishin arrestuar fillimisht pesë persona: Astrit Haraqija, Jeton Stanovci, Albana Xhemajli-Ramadani, Alban Maloku dhe Gëzim Feka.
Me arrestimin e Baftije Fekës, numri i të arrestuarve në kuadër të rastit “Heshtja” shkon në gjashtë.
Gjatë bastisjeve të zhvilluara më 14 nëntor në rajonin e Prishtinës, autoritetet kanë sekuestruar rreth 1.6 kilogramë kokainë, automjete të markave Mercedes-Maybach, Mercedes GLE, Porsche, Audi dhe Volkswagen Tiguan, si dhe rreth 16 mijë euro para të gatshme.
Në mesin e sendeve të sekuestruara janë raportuar edhe ora luksoze, telefona, pajisje elektronike, armë zjarri dhe municion. Vlera e përgjithshme e pasurisë së sekuestruar është rreth 301 mijë euro.
Hetimet në këtë rast lidhen me dyshimet për trafikim dhe shpërndarje të narkotikëve, ndërsa të dyshuarit gëzojnë prezumimin e pafajësisë.
Personat e arrestuar konsiderohen të pafajshëm derisa fajësia e tyre të vërtetohet me vendim gjyqësor të formës së prerë.
Sinjali – aty ku e vërteta flet para lajmit!
Burimi: Sinjali
