Një grua nga kantoni Vaud në Zvicër është gjobitur me 150 franga pasi hodhi dy fletë letre A4 në një kosh publik mbeturinash në Villeneuve VD.

Ngjarja ndodhi një të mërkurë, kur Clara* shkoi në park me fëmijët e saj. Ajo kishte disa letra në dorë dhe, teksa kaloi pranë një koshi, i hodhi brenda.

Një javë më vonë, ajo mori gjobën me postë. Shuma ishte 100 franga, ndërsa 50 franga të tjera u shtuan si tarifa administrative.

Sipas 20 Minutes, dy dokumentet ishin fletë A4 të kapura me kapëse dhe pjesë e një fature.

Bashkia e konsideroi shkelje

Bashkia e Villeneuve arriti në përfundimin se hedhja e letrave në koshin publik, në vend të koshit për riciklimin e letrës, ishte e paligjshme, transmeton Telegrafi.

Gruaja e kundërshtoi vendimin, duke ngritur pyetjen se cili është qëllimi i koshave publikë nëse nuk mund të hidhen në to dy fletë letre.

Sipas kryetarit të Villeneuve, Nicolas Riesen, bashkia ka besim të plotë te punonjësit e saj të betuar. Në rastet kur ata konstatojnë mbetje të dyshimta, nisin procedurat përkatëse.

Ai tha se një banor që nuk pajtohet me gjobën mund ta apelojë atë dhe të kërkojë një seancë dëgjimore.

Ankesa u tërhoq për të shmangur kostot shtesë

Riesen shpjegoi se gjatë një seance para komisionit të policisë mund të paraqiten rrethana që merren parasysh për heqjen e plotë ose të pjesshme të sanksionit. Sipas tij, çdo rast vlerësohet individualisht.

Gruaja fillimisht paraqiti kundërshtim ndaj gjobës, por më pas e tërhoqi ankesën me këshillën e oficerit të saj të mbrojtjes ligjore.

Ajo u këshillua ta paguante shumën për të shmangur kostot e mundshme shtesë që mund të sillte vazhdimi i procedurës./Telegrafi/