Qeveria britanike pritet të diskutojë mundësinë e ndryshimit të ligjit për moshën e pëlqimit seksual, pas akuzave për abuzim seksual ndaj komedianit Russell Brand dhe dënimit të tij me 10 vjet e gjysmë burgim.

Sekretari për Punë dhe Pensione, Pat McFadden, ka thënë se propozimi për vendosjen e një kufiri të shkallëzuar të moshës së pëlqimit është ngritur dhe do të diskutohet nga qeveria.

Duke folur në emisionin e BBC-së “Sunday with Laura Kuenssberg”, McFadden i cilësoi si tronditëse rrëfimet e fundit për abuzimin me pushtetin nga burra me ndikim.

Ai theksoi se nuk mund të parashikojë përfundimin e diskutimeve, por ngjarjet e javës së fundit e kanë vënë këtë çështje në qendër të vëmendjes.

Sipas ligjit aktual në Mbretërinë e Bashkuar, personat e rritur të çdo moshe mund të kryejnë marrëdhënie seksuale me 16 dhe 17-vjeçarë, për sa kohë nuk ekzistojnë rrethana të tjera që e bëjnë marrëdhënien të paligjshme.

Kërkesa për kufizime në marrëdhëniet mes të miturve dhe të rriturve

Thirrjet për ndryshimin e ligjit janë shtuar pas dënimit të Russell Brandit, i cili të hënën u shpall fajtor për një rast përdhunimi dhe tri raste sulmi seksual ndaj katër grave, për vepra të kryera ndërmjet viteve 2004 dhe 2009.

Ai u dënua me 10 vjet e gjysmë burgim, ndërsa u shpall i pafajshëm për dy akuza për përdhunim dhe një akuzë për tentim sulmi të pahijshëm.

Mia Latter, njëra nga gjashtë gratë që kishin ngritur pretendime ndaj Brandit në një hetim të publikuar më 2023 nga “The Times”, “The Sunday Times” dhe emisioni “Dispatches” i Channel 4, po kërkon që ligji të ndryshohet.

Ajo ka hequr dorë nga e drejta për anonimitet dhe ka treguar se ishte 16 vjeçe kur u njoh me Brandin, i cili në atë kohë ishte 30 vjeç.

Latter ka argumentuar se diferenca e madhe në moshë dhe pabarazia e pushtetit mes tyre ishin elemente që e bënin marrëdhënien problematike.

Ajo propozon që marrëdhëniet mes personave 16 deri në 17 vjeç dhe të rriturve dukshëm më të moshuar të konsiderohen vepër penale, pa kriminalizuar marrëdhëniet mes vetë adoleshentëve.

“Unë nuk dua që adoleshentët të kriminalizohen për marrëdhëniet seksuale me njëri-tjetrin”, ka thënë ajo.

Latter ka shtuar se do të ishte e arsyeshme që personat nga mosha 16 deri në 18 vjeç të mund të krijojnë marrëdhënie mes vete, por që marrëdhëniet me persona në të tridhjetat, të dyzetat apo të pesëdhjetat të trajtohen ndryshe nga ligji.

Edhe opozita kërkon debat për ndryshimin e ligjit

Helen Whatley, sekretare në hije për Punë dhe Pensione, ka vlerësuar se propozimi meriton të diskutohet.

Ajo ka thënë se si prind i vajzave adoleshente do të shqetësohej nëse ato do të krijonin marrëdhënie me një burrë shumë më të moshuar.

“Besoj se çdo prind do ta shikonte dy herë një situatë të tillë”, ka deklaruar Whatley, duke bërë thirrje që të zhvillohet debati për këtë çështje.

Ndërkaq, Anna Edmundson, drejtoreshë e politikave dhe ndryshimeve shoqërore në organizatën për mbrojtjen e fëmijëve NSPCC, ka paralajmëruar se 16 dhe 17-vjeçarët mund të jenë veçanërisht të cenueshëm ndaj manipulimit dhe shfrytëzimit seksual nga të rriturit.

Ajo ka theksuar se, ndonëse këta të rinj janë mbi moshën ligjore të pëlqimit seksual, kjo nuk do të thotë se nuk kanë nevojë për mbrojtje nga abuzimi.

Sipas saj, ndryshimet e bëra në vitet e fundit kanë kufizuar marrëdhëniet seksuale mes fëmijëve të kësaj moshe dhe personave që mbajnë pozita besimi ndaj tyre, por legjislacioni aktual ende nuk arrin t’i mbrojë plotësisht nga shfrytëzimi seksual.

Burimi: Dukagjini