Kryeministri i vendit, Albin Kurti, ka takuar në Shtetet e Bashkuara të Amerikës me shefen e diplomacisë të Bashkimit Evropian, Kaja Kallas, të cilës i ka bërë të ditur se vendi do të angazhohet që në Apel të korrigjohet aktgjykimi dënues ndaj katër ish-eprorëve të Ushtrisë Çlirimtare të Kosovës.
Kurti në takim me Kallas e ka cilësuar aktgjykimin si të rëndë dhe të padrejtë duke kritikuar edhe procesin gjyqësor në Hagë, të cilin e ka përshkruar si jo transparent në tërësinë e tij, njofton Dukagjini.
Kurti, mes tjerash, u shpreh se UÇK-ja lindi si përgjigje ndaj represionit dhe krimeve të kryera nga Serbia në Kosovë.
“Shpreha shqetësimin tim të thellë për dënimet e rënda dhe të padrejta ndaj ish-drejtuesve të UÇK-së, në aktgjykimin e shkallës së parë të Dhomave të Specializuara, pas një procesi pa transparencë në tërësinë e tij. Gjykimi nuk ka përfunduar dhe Republika e Kosovës do të angazhohet që ky proces dhe verdikt të korrigjohen në shkallën e apelit. Ushtria Çlirimtare Kosovës lindi si përgjigje ndaj represionit, vrasjeve e masakrave, dëbimeve masive e spastrimit etnik nga Serbia dhe lufta e saj për liri ishte e drejtë dhe e pastër. Serbia ishte agresori me plan gjenocidal. Qindra mijëra qytetarë u dëbuan nga shtëpitë e tyre dhe mijëra u vranë, ndërsa rreth 20 mijë gra e burra konsiderohen viktima të dhunës seksuale që u përdor si armë lufte. Shumë krime të forcave serbe mbeten ende pa u ndëshkuar”, ka shkruar Kurti.
Kurti ka folur gjithashtu për sulmin e armatosur në Banjskë, duke kërkuar nga BE-ja që të ushtrojë trysni ndaj Serbisë për dorëzimin para drejtësisë të Milan Radoiçiqit dhe personave të tjerë të përfshirë në sulm.
Ai ka theksuar se më 24 shtator bëhen tre vjet nga sulmi në Banjskë, ku u vra rreshteri i Policisë së Kosovës, Afrim Bunjaku.
“Pasnesër, më 24 shtator, mbushen tre vjet nga agresioni i Serbisë dhe sulmi terrorist në Banjskë të Zveçanit, ku u vra rreshteri i Policisë së Kosovës, heroi Afrim Bunjaku. Ndërkohë, Millan Radoiçiq dhe pjesëtarët e tjerë të grupit terrorist paramilitar, të cilët po mbrohen nga presidenti i Serbisë, teksa i ofrojnë mbrojtje dhe shërbime, duhet të përballen me drejtësinë në Kosovë. Për këtë kërkova përkrahjen e BE-së që t’i bëjnë trysni Serbisë”, ka shkruar Kurti.
Gjatë takimit, Kurti tha se përderisa Kosova është e përcaktuar në rrugën e saj evropiane dhe euroatlantike, në aspektin strategjik, Serbia fqinje “sikur qëndron mes Rusisë dhe Kinës”.
