“Diktatorët gjithmonë gënjejnë për të kaluarën — por shumë shpesh të tregojnë saktësisht se çfarë do të bëjnë,” ka deklaruar Garry Kasparov mjeshtër i madh rus i shahut, aktivist politik dhe shkrimtar, duke komentuar politikat dhe qëndrimet e presidentit rus Vladimir Putin.
Kasparov argumenton se mënyra se si Putin e ka interpretuar historinë është një tregues i qartë i objektivave të tij afatgjata.
Sipas tij, që në vitin 2005, Putin e kishte cilësuar shpërbërjen e Bashkimit Sovjetik si “katastrofën më të madhe gjeopolitike të shekullit XX”, një deklaratë që Kasparov e sheh si sinjal të qartë të nostalgjisë për një rend të vjetër perandorak dhe përpjekjeve për ta rikthyer atë.
Ai gjithashtu kujton fjalimin e Putinit në Konferencën e Sigurisë në Mynih në vitin 2007, ku presidenti rus kritikoi ashpër rendin ndërkombëtar të udhëhequr nga Perëndimi dhe NATO.
⚡️ “Dictators always lie about the past — but very often tell you exactly what they are going to do,” Garry Kasparov said about Putin
— NEXTA (@nexta_tv) May 21, 2026
According to Kasparov, Putin openly described the collapse of the Soviet Union as “the greatest geopolitical catastrophe of the 20th century”… pic.twitter.com/lIiB0RClQw
Sipas Kasparov, ky moment shënoi një kthesë të qartë, ku Rusia filloi të sfidonte hapur strukturën e sigurisë evropiane dhe amerikane.
Në analizën e tij, Kasparov thekson se Ukraina është objektivi më i menjëhershëm i kësaj politike, por jo pika përfundimtare. Ai pretendon se synimi strategjik i Putinit është më i gjerë: rikthimi i një forme perandorie ruse dhe shtyrja e NATO-s përsëri në kufijtë e vitit 1997, duke ndryshuar ekuilibrat e sigurisë në Evropë.
Sipas tij, problemi kryesor është se shumë vende evropiane ende nuk po i marrin seriozisht këto paralajmërime dhe vazhdojnë t’i shohin si retorikë politike.
Ai paralajmëron se kjo qasje është e rrezikshme, duke theksuar se situata nuk duhet trajtuar më thjesht si një “kërcënim i mundshëm”, por si një rrezik real dhe i vazhdueshëm për stabilitetin ndërkombëtar. /Telegrafi
The post Kasparov për Putinin: Diktatorët gjithmonë gënjejnë për të kaluarën appeared first on Gazeta Express.
