Presidentja e Bullgarisë, Ilijana Jotova,deklaroi se Bullgaria nuk do të heqë dorë nga bullgarët në Republikën e Maqedonisë së Veriut dhe do të vazhdojë t’i mbrojë të drejtat e tyre.
Ajo mori pjesë në shënimin kombëtar të 123-vjetorit të Kryengritjes së Ilindenit dhe të Preobrazhenies.
“Ne nuk mund të mos vërejmë edhe diçka tjetër sot – sa plagë, sa ndarje. Sot në Republikën e Maqedonisë së Veriut njerëzit flasin për bullgarët, ndërsa historia jonë është e përbashkët. Çfarë kemi për të ndarë?”, tha Jotova.
Ajo theksoi se si politikanët, ashtu edhe shoqëria duhet t’i kundërvihen gjuhës së urrejtjes dhe ndarjeve.
“Ne nuk do të heqim dorë nga ju dhe do t’i mbrojmë të drejtat tuaja – të drejtat e çdo njeriu. Dhe kjo nuk është një deklaratë politike. Për mua, ky është interpretimi i vërtetë i amanetit të popullit të Ilindenit, i cili e dinte se vetëm në unitet dhe bashkim mund të kemi liri, shtetësi dhe lirinë e çdo njeriu”, tha presidentja.
Jotova kujtoi sakrificën e pjesëmarrësve në Kryengritjen e Ilindenit dhe të Preobrazhenies të vitit 1903, si dhe jetën e shkurtër të Republikës së Stranxhës.
“Nuk mund t’i harrojmë ato 20 ditë lirie. Nuk mund ta harrojmë Republikën e Stranxhës. Ajo u lag me gjak, toka bullgare, e shumëvuajtur, u mbulua me varre të pashënuara, por Bullgaria u ringjall këtu”, tha Jotova.
Festimi kombëtar në zonën e Petrova Nivës i kushtohet 123-vjetorit të Kryengritjes së Ilindenit dhe të Preobrazhenies.
