Ushtria izraelite goditi një ndërtesë në qytetin e Gazës mbrëmjen e së martës, në një operacion që kishte në shënjestër liderin e ri të krahut ushtarak të Hamas në enklavën palestineze.
Sipas rrjetit televiziv izraelit Keshet 12, një zyrtar i sigurisë deklaroi se besohet se Mohammed Oda ka mbetur i vrarë nga sulmi.
Kryeministri izraelit, Benjamin Netanyahu, reagoi përmes një postimi në platformën X, ku konfirmoi se objektivi i operacionit ishte Oda.
“Ne sulmuam Mohammed Oda-n në Gaza – udhëheqësin e krahut ushtarak të Hamasit dhe një nga arkitektët e masakrës së 7 tetorit 2023. Do t’i arrijmë të gjithë”, shkroi Netanyahu.
Mohammed Oda kishte marrë drejtimin e Brigadave Al-Qassam pas vrasjes së Izz ad-Din al-Haddadin, i cili humbi jetën në një sulm ajror izraelit më 15 maj.
Ndërkohë, Shërbimi i Mbrojtjes Civile në Gaza raportoi se tre persona u vranë nga bombardimi izraelit në lagjen Rimal të qytetit të Gazës, mes tyre edhe një grua.
Sulmet vijnë në një moment tensionesh të larta në rajon dhe në vazhdën e ofensivës së vazhdueshme izraelite kundër Hamasit në Rripin e Gazës.
The post Izraeli: Është vrarë një nga udhëheqësit e Hamasit appeared first on Gazeta Express.
