Partia Demokratike e Kosovës ka mbajtur tubimin e parafundit të fushatës zgjedhore në Mitrovicë, ku prezentë ishin edhe vëllezërit e ish-kryetarit Kadri Veseli, Vesel Veseli dhe Ismet Veseli.
Kryetari i Degës së PDK-së në Mitrovicë, Arian Tahiri, ishte i pari që iu drejtua mitrovicasve, duke thënë se secilat palë zgjedhje kanë qenë të rëndësishme, por sipas tij, këto zgjedhje janë më të rëndësishme, sepse janë zgjedhje për Kosovën.
Tahiri kritikoi kryeministrin në detyrë, Albin Kurtin, duke thënë se ka bërë marrëveshje të dëmshme me Serbinë dhe se e ka varfëruar qytetarin.
“Ju kërkoj që secili qytetar i Mitrovicës ta ndëshkojë me votë Albin Kurtin. Ai ka ardhur në pushtet duke thënë se nuk bën negociata me Serbinë, por ka bërë marrëveshje të dëmshme. Po e përmendi edhe të fundit marrëveshje, Ligjin e Shtetësisë. Kjo rrezikon që të mbipopullohet shteti me qytetarë serbë. Ne do të angazhohemi që ta arrijmë shumicën parlamentare që ta anulojmë këtë ligj. Ka thënë se do t’i bëjë 160 cerdhe e banesa sociale. Ku janë ato banesa, ku janë ato projekte që ka folur shumë. Ka thënë që do ta bëjë bashkimin kombëtar, na ka pëlqyer kauza, por e kemi ditur se po mashtron. Na ka larguar nga Shqipëria dhe e ka rritur importin me Serbinë. Ka folur për çmim të bukës, vajit, ujit. Ka bërë drama me Mitrovicën dhe e ka zhvendosur vëmendjen te Mitrovica. Jam krenar që PDK-ja e ka vendosur Pikën 1 dhe 31”, tha Tahiri.
Tutje, Tahiri tha se Kurti ka tentuar që betejën e Banjskës ka tentuar ta bëjë më të rëndësishme sesa betejat e UÇK-së, por e ka lënë të ikë kryekriminelin Milan Radoiçiq.
“Betejën e Banjskës ka tentuar që ta bëjë ma të rëndësishme sesa betejat e UÇK-së. Kush ka qenë ajo polici, polici që e ka themeluar Hashim Thaçi me Bedri Hamzën. Nëse flasim për poena politikë për Banjskën, pse s’e ke zënë kriminelin Radoiçiq, 20 kilometra ka ecur duke pirë cigare e ujë. Një projekt tjetër të madh po e përmendi që e ka bërë Kadri Veseli me Bedri Hamzën është Universiteti “Isa Boletini”. O zotëri, ti ke fituar për t’i ndalur negociatat me Serbinë, të kërkojë falje Serbia e për ta zbardhur rastin e Astrit Dehari.. Por, propagandën e ka të fortë, e kam provuar në lëkurën time.. Andaj, duhet ndalur kjo qasje manipuluese e këtij njeriu. Ky ka abuzuar.. nuk ka qeverisur, nuk ka prodhuar kurrgjë të hairit. Hashim Thaçi me 33%, për dy ditë e bënte presidentin sepse kishte kapacitet.. Mitrovica duhet ta japë mesazhin me votë dhe ta sjellin mundësinë që Bedri Hamza ta udhëheqë Kosovën”.
E, kandidati i PDK-së për kryeministër, Bedri Hamza, u kërkoi bashkëqytetarëve të tij votën për ta udhëhequr Kosovën pasi tha se Kosova nuk është mirë.
Hamza tutje u shpreh se gjatë këtyre viteve vendi ka parë drama, kriza, polarizime, sulme ndaj mediave, shoqërisë civile e sipas tij, ndaj çdo gjëje që nuk mendon si Kurti.
“Ne ballafaqohemi çdo ditë me çmime te larta.. e kjo situatë duhet ta ketë një fund sepse qeveria e udhëhequr nga PDK-ja do ta kthej Kosovën kah e mbara. PDK-ja garon me një program konkret.. ne do të krijojmë kushte për biznese, nuk i sulmojmë.. dhe do të krijojmë kushte të përshtatshme e ambient miqësor për ta. Kur të rritet buxheti, PDK-ja do t’i rrisë pagat prej 50% për të gjithë shërbyesit civilë. Do t’i rrisim pensionet për të gjithë në vlerë prej 50%. Në qeverisjen e PDK-së, nuk do të ketë pension më të vogël se 300 euro. Për shëndetësinë, zgjerim i listës esenciale të barnave e furnizim të mjaftueshëm. Ne garantojmë zbatimin e sigurimeve shëndetësore. Arsim modern, digjitalizim të sistemit arsimor, fond për bursa, 30 milionë euro për bursa. Për çiftet e reja, do t’i subvencionojmë dallimin në mes çerdheve publike dhe private, do të ndërtojmë kapacitete të reja energjetike, duke përfshirë projektin e gazit. Do ta rivitalizojmë Trepçën. Do t’i përfundojmë rrugët ekzistuese, do t’i lidhim autostradat dhe hekurudhat.. po ju lus që deri të dielën të flisni me miq e familjarë që ta votojnë PDK-në”, tha Hamza.
