Deputeti i LDK-së, Arben Gashi, ka thënë se është i bindur që kryeministri në detyrë dhe kreu i LVV-së, Albin Kurti, e ka ditur se kandidatura e Bekim Sejdiut për President nuk do të merrte votat e nevojshme.
Duke folur në “Debat Plus”, Gashi tha se beson se edhe kryetari i LDK-së, Lumir Abdixhiku, e ka ditur këtë, por mund të ketë menduar se kandidatura do të kalonte “disi”.
“Unë jam i bindur që Albin Kurti e ka ditur që Bekim Sejdiu nuk kalon. Për Abdixhikun, unë mendoj i zgjuar edhe e ka ditur, ndoshta ka menduar që e kalon disi”, tha Gashi.
Sipas tij, çështja nuk duhet të shihet vetëm nga perspektiva e zgjedhjeve të reja, por si një çështje e mendimit strategjik për vendin dhe për partinë.
Gashi kritikoi gjithashtu mënyrën se si është zhvilluar marrëveshja për Presidentin, duke thënë se Abdixhiku fillimisht kishte kërkuar që LDK-ja ta merrte postin e Presidentit, ndërsa më pas, sipas tij, ishte pranuar një kandidat që nuk i përmbush kriteret e kërkuara.
“Abdixhiku tha: ‘Po du Presidentin’. I kemi thënë: ani. U kthye tha: ‘Nuk ma kanë dhënë’. Po me ba marrëveshje, me gjet marrëveshje konsensuale, bëje. Tash vjen me një që nuk e ka asnjë kriter që e ka kërkuar”, deklaroi Gashi.
