Një valë ekstreme e të nxehtit që ka përfshirë pjesën më të madhe të Evropës po detyron shtetet të marrin masa të jashtëzakonshme për mbrojtjen e qytetarëve. Franca ka vendosur kufizime të pjesshme për konsumimin e alkoolit, Gjermania ka lëshuar paralajmërime në nivel kombëtar, ndërsa Spanja ka mbyllur një zonë të dedikuar për tifozët e futbollit, teksa temperaturat po i afrohen niveleve rekord.
Në Francë, autoritetet parashikojnë që 35 nga 96 departamentet e vendit të jenë nën alarmin e kuq për shkak të vapës së madhe. Temperaturat pritet të lëvizin nga 39 deri në 40 gradë Celsius në një zonë të gjerë që shtrihet nga jugperëndimi i vendit, përmes rajonit të Parisit e deri në Burgonjë, ndërsa në disa vende termometri mund të arrijë deri në 41 gradë Celsius.
Pas një mbledhjeje urgjente, kryeministri Sebastien Lecornu ka vendosur të ndalojë paraprakisht konsumimin e alkoolit të dielën gjatë festivaleve vjetore Fête de la Musique dhe në ngjarje të tjera publike që do të zhvilloheshin në ato 35 rajone. Megjithatë, autoritetet në Paris urdhëruan që parqet të qëndronin të hapura gjatë gjithë ditës dhe natës.
Paralajmërime për temperatura të larta u shpallën në pjesën më të madhe të Gjermanisë, ku temperaturat po afroheshin me 38 gradë celsius. Shërbimi meteorologjik gjerman DWD ka paralajmëruar se kombinimi i vapës dhe lagështisë mund të shkaktonte stuhi të forta.
Përtej Alpeve, temperaturat që priteshin të arrinin 36–37 gradë celsius po ndryshojnë jetën e përditshme dhe turizmin në disa qytete italiane.
Vizitorët prisnin në radhë nën diellin përvëlues jashtë Koloseut, ndërsa vapa e verës në Romë e kishte kthyer vizitën turistike në një provë qëndrueshmërie. Disa kërkonin lehtësim në hapësirat më të freskëta nëntokësore poshtë mbetjeve pjesërisht të fshehura të Tempullit të Klaudit.
Në qytetin verior të Bolonjës, një nga më të nxehtit në gadishullin italian, njerëzit freskoheshin duke spërkatur fytyrat me ujë te Shatërvani i Neptunit i shekullit të 16-të.
Ndërkohë, në Spanjë, federata e futbollit ka vendosur të mbyllë zonën e tifozëve që kishte ngritur me ekrane gjigante në sheshin Plaza de Colón në Madrid. Kjo do të thotë se tifozët do të duhet ta ndjekin ndeshjen e Spanjës kundër Arabisë Saudite në Kupën e Botës diku tjetër.
Shkencëtarët thonë se ndryshimet klimatike po i bëjnë valët e të nxehtit më të shpeshta dhe më intensive në të gjithë Evropën, duke rritur rrezikun e emergjencave shëndetësore dhe të ndërprerjeve ekonomike gjatë muajve të verës.
Edhe kostoja ekonomike e vapës ekstreme po tërheq gjithnjë e më shumë vëmendje.
Guvernatori i Bankës së Francës, Emmanuel Moulin, ka thënë se efektet afatshkurtra mbi rritjen ekonomike janë “disi të paqarta”, duke përmendur si uljen e produktivitetit ashtu edhe rritjen e konsumit të energjisë.
Megjithatë, ai ka paralajmëruar se në afat të mesëm valët e të nxehtit ndikojnë negativisht në aktivitetin ekonomik.
