Filipinet dhe Vietnami kanë vendosur të forcojnë më tej marrëdhëniet dypalëshe duke e ngritur partneritetin e tyre strategjik në nivelin e një “partneriteti strategjik të përforcuar”, me theks të veçantë në bashkëpunimin politik, të sigurisë dhe çështjet detare.
Vendimi u formalizua gjatë takimit në Manila mes presidentit vietnamez To Lam dhe presidentit filipinas Ferdinand Marcos Jr., të cilët riafirmuan angazhimin për zgjerimin e bashkëpunimit në fusha me interes të përbashkët.
Vizita e To Lam në Filipine, e para shtetërore që nga marrja e detyrës së tij, përkon me 50-vjetorin e marrëdhënieve diplomatike ndërmjet dy vendeve dhe një dekadë nga krijimi i partneritetit strategjik mes tyre.
Në kuadër të marrëveshjes së re, të dyja palët do të intensifikojnë koordinimin në çështjet detare, duke përfshirë zbatimin e mekanizmave për parandalimin dhe menaxhimin e incidenteve në Detin e Kinës Jugore, si dhe zgjerimin e bashkëpunimit ndërmjet forcave të rojes bregdetare.
Liderët e dy vendeve theksuan gjithashtu rëndësinë e zgjidhjes paqësore të mosmarrëveshjeve dhe incidenteve detare në përputhje me normat e së drejtës ndërkombëtare, duke e cilësuar stabilitetin dhe sigurinë rajonale si prioritete të përbashkëta.
