Kriza e zhvendosjes në Haiti po përhapet përtej kryeqytetit, me afro 1.5 milionë persona të detyruar të largohen nga shtëpitë e tyre në të gjithë vendin, sipas një raporti të publikuar të premten nga Organizata Ndërkombëtare për Migracionin (IOM).
Sipas raportit, rreth 80 për qind e personave të zhvendosur brenda vendit tashmë ndodhen jashtë kryeqytetit Port-au-Prince. Rritja më e madhe e fundit e numrit të të zhvendosurve është regjistruar në departamentin Artibonite, i cili dikur konsiderohej strehë për familjet që largoheshin nga zonat e tjera të prekura nga dhuna, shkruan Reuters, transmeton Dukagjini.
Bandat e armatosura në Haiti kanë pothuajse kontroll të plotë mbi Port-au-Prince dhe po zgjerojnë ndikimin e tyre edhe në zonat rurale.
Në Artibonite, numri i personave të zhvendosur u rrit ndërmjet muajve maj dhe gusht të vitit 2026, pasi përshkallëzimi i pasigurisë detyroi valë të reja largimesh dhe reduktoi mundësitë për gjetjen e zonave të sigurta, bëri të ditur IOM.
Ndërkohë, pranë kryeqytetit, sulmet e fundit të armatosura në Kenscoff kanë detyruar më shumë se 4 mijë persona të largohen nga shtëpitë e tyre. Raporti përmend gjithashtu raste të djegies së banesave, rrëmbimeve dhe vrasjeve.
Qindra mijëra persona të zhvendosur po jetojnë në kampe të improvizuara, qendra kolektive apo kushte të tjera të pasigurta, duke u bërë edhe më të cenueshëm gjatë sezonit të uraganeve në Atlantik.
“Për familjet që tashmë janë zhvendosur për shkak të dhunës, një stuhi e madhe mund të shkaktojë një tjetër emergjencë humanitare”, tha Elise Verron, koordinatore e lartë e emergjencave e IOM-it në Haiti.
