Dy deputetë të Partisë Demokratike të Kosovës (PDK), Arben Mustafa dhe Eliza Hoxha, kanë vazhduar edhe sot aksionin e tyre para ndërtesës së Qeverisë së Kosovës.
Ata janë afruar te hyrja e objektit, ku janë përballur me dyer të mbyllura nga sigurimi. Deputetët e PDK-së e kanë pyetur sigurimin nëse kryeministri në detyrë, Albin Kurti, ka arritur në ndërtesën e Qeverisë.
“Deputeti Kurti a ka ardhë, a është këtu?”, kanë pyetur ata, duke iu referuar Kurtit si deputet.
Në një moment, sigurimi u ka thënë diçka deputetëve, por për shkak të dyerve të mbyllura, ata nuk kanë arritur ta dëgjojnë.
Sigurimi më pas e ka hapur derën për të komunikuar me deputetët.
“Thjesht po na intereson me e ditë nëse ka ardhë Kurti. Deputetë ne, deputetë ai, të zgjedhur ne, i zgjedhur ai”, kanë deklaruar Mustafa dhe Hoxha.
Ata kanë thënë se do ta presin Kurtin para dyerve të Qeverisë deri në ardhjen e tij.
Aksioni i PDK-së, i nisur të enjten, po vazhdon edhe sot me kërkesën që të mbahet vazhdimi i seancës konstituive të Kuvendit të Kosovës.
PDK-ja dhe AAK-ja kanë kërkuar nga kryesuesi i seancës, Avni Dehari, që ta thërrasë vazhdimin e seancës për orën 11:00.
The post Deputetët e PDK afrohen te hyrja ndërtesës së Qeverisë, e pyesin sigurimin për Kurtin – “a ka ardhë”? appeared first on Gazeta Express.
