Një nga emrat më të mëdhenj të boksit botëror, Anthony Joshua, rikthehet këtë fundjavë në ring për t’u përballur me boksierin shqiptar Kristian Prenga, në një ndeshje që konsiderohet vendimtare për të ardhmen e karrierës së tij. Një fitore ndaj Prengës do t’i hapte rrugën superpërballjes së shumëpritur me Tyson Furyn, për të cilën mediat britanike raportojnë se tashmë ekziston një marrëveshje paraprake.
Për Joshua-n, kjo do të jetë ndeshja e parë pas një periudhe të vështirë, gjatë së cilës u tërhoq përkohësisht nga aktiviteti për t’u rikuperuar fizikisht dhe emocionalisht pas aksidentit tragjik automobilistik të muajit dhjetor, ku humbën jetën dy miq të tij të ngushtë. Tashmë ish-kampioni i botës në peshat e rënda synon një rikthim bindës dhe një tjetër mundësi për të luftuar për titujt më të rëndësishëm.
Kur dhe ku zhvillohet ndeshja?
Dueli mes Anthony Joshua dhe Kristian Prengës do të zhvillohet të shtunën, më 25 korrik, në Jeddah Superdome në Jeddah të Arabisë Saudite.
Hyrja e dy boksierëve në ring pritet të nisë jo më herët se ora 22:00 sipas kohës britanike, ndërsa eventi do të transmetohet drejtpërdrejt në platformën DAZN për shikuesit në mbarë botën.
Mbrëmja e boksit do të përfshijë gjithsej 13 duele, me përballjen Joshua–Prenga që do të jetë eventi kryesor.
Joshua favorit, por Prenga beson te surpriza
Anthony Joshua hyn në këtë duel si favorit absolut. Gjatë karrierës së tij, ai ka pësuar vetëm katër humbje, të gjitha ndaj kundërshtarëve elitë si Andy Ruiz Jr., Oleksandr Usyk (dy herë) dhe Daniel Dubois.
Megjithatë, Kristian Prenga paraqitet me një rekord mbresëlënës prej 20 fitoresh dhe vetëm një humbjeje, ndërsa të gjitha fitoret e tij kanë ardhur me nokaut. Boksieri shqiptar, i gjatë 196 centimetra, është i bindur se mund të shkaktojë një nga surprizat më të mëdha të vitit.
Deklaratat e dy boksierëve
Joshua tha se ndihet plotësisht i përgatitur për rikthimin në ring dhe se mezi pret të nisë kapitullin e ri të karrierës.
“Nuk është sekret që kam marrë kohë për t’u konsoliduar dhe për t’u rindërtuar, në mënyrë që të jem gati të rikthehem në ring. Ky është hapi i radhës në rrugëtimin tim. Jam i lumtur që kemi arritur marrëveshje për disa ndeshje, duke nisur me 25 korrikun në Arabinë Saudite. Mezi pres të rikthehem në garë.”
Nga ana tjetër, Kristian Prenga deklaroi se Joshua ka gabuar duke e zgjedhur si kundërshtar.
“Anthony Joshua është një boksier i madh, por ka bërë një gabim të madh duke më zgjedhur mua. Kjo është ndeshja që mund të ndryshojë gjithçka në jetën time dhe në karrierën e tij.”
Prenga shtoi se është i vetëdijshëm për planet që kampi i Joshua-s ka pas kësaj ndeshjeje, por beson se do t’i prishë ato.
“E di që më nënvlerësojnë dhe kjo më pëlqen. Do t’i befasoj të gjithë dhe do ta trondit botën e boksit këtë korrik në Arabinë Saudite.”
Karta e plotë e mbrëmjes
Përveç duelit kryesor mes Anthony Joshua dhe Kristian Prengës, publiku do të ndjekë edhe këto përballje:
Anthony Joshua – Kristian Prenga (Ngjarja kryesore)
Hamzah Sheeraz – Simon Zachenhuber
Josh Kelly – Caoimhin Agyarko
Reito Tsutsumi – Alvino Herrera Meza
Oleksandr Khyzhniak – Lenny Patrach
Jacob Bank – Pawel August
Mikie Tallon – Orlando Pino
Nishant Dev – Cesar Diaz
Ziyad Almaayouf – Frank Lucian Mango
Mohammed Alakel – Lydon Chircop
Sultan Almohammed – Efren Besalduch
Omar Hikal – Brian Castellano
Mohamed Mabrouk Yehya – Bryan Zapata
Vëmendja kryesore e mbrëmjes do të jetë te sfida mes Anthony Joshua dhe Kristian Prengës. Për britanikun, fitorja do ta afronte me superduelin ndaj Tyson Furyt, ndërsa për boksierin shqiptar kjo është mundësia më e madhe e karrierës për t’u afirmuar në skenën botërore të peshave të rënda.
