Delegacioni parlamentar, i kryesuar nga Kryetari i Kuvendit, Afrim Gashi më 12–14 maj zhvilloi në Bern, sesione pune në kuadër të programit “Diskutimet Malore për Etikën Parlamentare”. Qëllimi kryesor i këtyre diskutimeve ishte arritja e konsensusit ndërmjet partive politike për miratimin e një Kodi të ri Etik për deputetët, thuhet në njoftimin e Kuvnedit të RMV-së.
“Në sesionin e parë të punës, fjalë hyrëse kishin Kryetari i Kuvendit, Afrim Gashi, si dhe Ambasadori i Zvicrës, Christoph Sommer.
Gashi theksoi rëndësinë e gatishmërisë dhe vullnetit politik për të arritur konsensus rreth kësaj teme të rëndësishme për Kuvendin dhe për besimin e qytetarëve në institucionet demokratike. Ai shprehu optimizmin që përmes këtij procesi të reflektohet mbi vlerat demokratike në funksion të integritetit parlamentar dhe përgjegjësisë publike.
Ambasadori Sommer shprehu kënaqësinë që po mirëpret në Bern delagacionin parlamentar dhe që Zvicra po kontribuon në këtë proces domethënës për kulturën politike.
Nënkryetarët dhe kordinatorët e grupeve parlamentare, konfirmuan rëndësinë e ngritjes së kulturës demokratike, përgjegjësisë publike dhe ruajtjes së dinjitetit të Kuvendit, si dhe rëndësinë e konsensusit ndërpartiak”, thonë nga Kuvendi.
Nga atje shtojnë se gjatë debatit, deputetët paraqitën komente dhe propozime konkrete për përmirësimin e formulimeve të caktuara të draft- Kodit Etik, me qëllim që dispozitat të jenë më të qarta, të zbatueshme dhe në përputhje me standardet demokratike parlamentare./Telegrafi/
