Deputeti i Lidhjes Demokratike të Kosovës, Ermal Sadiku, u ka bërë thirrje institucioneve të verifikojnë me urgjencë raportimet për probleme me sigurinë e llogarive në WhatsApp dhe t’i informojnë qytetarët për masat mbrojtëse.
Sadiku, i cili drejton edhe një kompani të teknologjisë informative, tha se problemi mund të jetë më i gjerë sesa kishte menduar fillimisht. Ai kërkoi që institucionet përgjegjëse të kontaktojnë partnerët ndërkombëtarë dhe kompanitë përkatëse për të sqaruar çfarë po ndodh.
Sipas tij, janë raportuar tentativa për marrjen e llogarive, të dhënave personale dhe kodeve të verifikimit, përfshirë ato që lidhen me shërbimet bankare. Ai propozoi të shqyrtohen edhe masa të përkohshme ndaj SMS-ve të dyshimta, nëse verifikimi teknik tregon se janë të nevojshme.
“Nuk dua të krijoj panik, por kjo nuk duhet të neglizhohet. Duhet reagim institucional, verifikim teknik i asaj që po ndodh dhe njoftim i menjëhershëm i qytetarëve se si të mbrohen”, u shpreh Sadiku.
Për probleme me llogarinë e tij në WhatsApp shkroi edhe deputeti i Lëvizjes Vetëvendosje, Mefail Bajqinovci, i cili kërkoi informacion se çfarë po ndodh.
Shqetësimin e kishte ngritur më herët në rrjetet sociale Darsej Rizaj, bashkëthemelues i “Shkollës Digjitale” dhe “StarLabs”. Ai tha se edhe biznese të shumta kishin raportuar probleme të ngjashme.
Shkaku dhe përmasat e problemeve të raportuara nuk janë konfirmuar teknikisht. Qytetarëve u është bërë thirrje të mos i ndajnë me të tjerët kodet e verifikimit që marrin përmes SMS-ve dhe të mos hapin lidhje të dyshimta.
