Deputeti i LDK-së, Lutfi Haziri, ka thënë se në kuadër të diskutimeve për zgjedhjen e presidentit nuk ka pasur oferta të tjera përveç asaj për të cilën, sipas tij, LDK-ja ishte pajtuar me Lëvizjen Vetëvendosje. Ai ka treguar edhe për emra të tjerë që, sipas tij, janë përmendur gjatë diskutimeve për këtë pozitë.
Lutfi Haziri, në emisionin “Këndi i debatit”, ka folur për diskutimet brenda LDK-së dhe me subjektet e tjera politike lidhur me zgjedhjen e presidentit të Kosovës.
Ai ka mohuar se kryetari i LDK-së, Lumir Abdixhiku, ka pasur ndonjë ofertë tjetër për pozitën e presidentit.
“Ofertë tjetër nuk ka pasur. Edhe nëse do të kishte ofertë tjetër, z. Abdixhiku sigurisht që do ta kishte thirrur grupin parlamentar për ta njoftuar. Ofertë tjetër nuk ka pasur, as nuk ka pasur për president”, tha Haziri.
Sipas tij, LDK-ja dhe Vetëvendosje kanë qenë dakord që presidenti i ardhshëm të mos jetë figurë politike.
“Ne jemi dakord me z. Kurti dhe me pëlqimin e të gjithë deputetëve që presidenti të mos jetë politik. Edhe tani e dini kush është propozuar. Ideja ime ka qenë që të jetë një person me merita, por jo politik”, u shpreh Haziri.
Haziri ka thënë se gjatë diskutimeve janë përmendur edhe emra të tjerë, përfshirë persona me përvojë diplomatike dhe publike.
“A e dini sa emra kanë ardhur, edhe prej mediave, edhe prej ambasadorëve e diplomatëve? Kanë qenë emra kredibilë politikisht, por jo politikë”, deklaroi ai.
Ai përmendi edhe ish-ambasadorin William Walker , duke thënë se gjatë diskutimeve ishte bërë rekomandim me shkrim për Faton Bislimin.
“Për shembull, ish-ambasadori Walker ka bërë rekomandim me shkrim për Faton Bislimin. Ka pasur kandidatura, janë thirrur kandidatë”, tha Haziri.
Haziri nuk dha detaje për një ofertë konkrete alternative për postin e presidentit, por këmbënguli se, sipas tij, nuk ka pasur një ofertë tjetër zyrtare për LDK-në për këtë pozitë.
