Temperatura mesatare globale në gusht theu rekordin e mëparshëm të vendosur në vitin 2023, sipas të dhënave të publikuara nga Shërbimi i Ndryshimeve Klimatike të Bashkimit Evropian, Copernicus.
Sipas të dhënave, temperatura mesatare globale e ajrit muajin e kaluar ishte 16.96 gradë Celsius, duke shënuar temperaturën mesatare mujore globale më të lartë të regjistruar ndonjëherë.
“Qeniet njerëzore nuk kanë përjetuar temperatura kaq të larta sa sot, me shumë gjasa, të paktën gjatë 100 mijë viteve të fundit”, tha Samantha Burgess nga Qendra Evropiane për Parashikime Meteorologjike Afatmesme, institucion që mbikëqyr Copernicus.
Të dhënat e Copernicus, të cilat datojnë që nga viti 1940, tregojnë se rekordi i mëparshëm i temperaturës mesatare mujore ishte regjistruar në korrik të vitit 2023.
Evropa Perëndimore regjistroi këtë vit verën më të nxehtë ndonjëherë, pas valëve të njëpasnjëshme të të nxehtit, thatësirës dhe zjarreve.
Ndërmjet mesit të korrikut dhe mesit të gushtit, në Evropë u regjistruan më shumë se 32 mijë vdekje shtesë të lidhura me temperaturat e larta, sipas vlerësimeve të platformës së monitorimit EuroMomo.
Ndërkohë, temperaturat e oqeaneve arritën gjithashtu nivel rekord, duke zgjatur një periudhë prej tre muajsh me ngrohje rekord të oqeaneve në mbarë botën.
Temperaturat e larta të oqeaneve po shkaktojnë pasoja të rënda për jetën detare, shkëmbinjtë koralorë dhe komunitetet bregdetare.
Për më tepër, El Niño, që vlerësohet të jetë më i fuqishmi i epokës moderne, pritet të sjellë ujëra jashtëzakonisht të ngrohta në Paqësor, duke rritur mundësinë e motit ekstrem në pjesë të ndryshme të botës, nga përmbytjet dhe thatësirat deri te zjarret, shkruan DW.
The post Gushti thyen rekordin, muaji më i nxehtë i regjistruar ndonjëherë në botë appeared first on Gazeta Express.
