Negociatorët kryesorë të presidentit amerikan Donald Trump janë takuar me presidentin rus Vladimir Putin gjatë vizitës së tyre në Moskë për bisedimet e paqes.
Pamjet e publikuara nga mediat shtetërore ruse tregojnë Steve Witkoff dhe Jared Kushner duke u pritur nga Putini, ndërsa përpjekjet për t’i dhënë fund luftës në Ukrainë po marrin ritëm, raporton BBC.
Trump u tha gazetarëve të premten se Witkoff dhe Kushner “po sjellin me vete një propozim për t’i dhënë fund luftës”. Deri më tani, përpjekjet e SHBA-së dhe aleatëve të saj për të ndërmjetësuar një marrëveshje paqeje kanë dështuar. Të dielën, ata do të udhëtojnë drejt Kievit për bisedime të tjera.
Rusia dhe Ukraina kanë deklaruar se do të ndalojnë sulmet ndaj kryeqyteteve të njëra-tjetrës për tri ditë, gjatë kohës që delegacioni do të zhvillojë vizitën.
Zelensky tha të shtunën se kishte biseduar me të dërguarit, të cilët “kanë filluar tashmë të punojnë me palën ruse sot”.
“Plani për angazhimet diplomatike të nesërme në Kiev, ku do të marrë pjesë ekipi amerikan, është miratuar. Po presim Steve Witkoff dhe Jared Kushner dhe jemi të gatshëm për një bisedë thelbësore”, shtoi ai.
“Që nga tani deri në fund të së shtunës, si dhe të dielën dhe të hënën, Ukraina është e gatshme të përmbahet nga sulmet ndaj Moskës dhe presim që rusët të bëjnë të njëjtën gjë sa i përket Kievit.”
Mediat shtetërore ruse raportuan se presidenti Vladimir Putin kishte urdhëruar ndalimin e sulmeve ndaj Kievit për tri ditë, për shkak të vizitës së delegacionit amerikan.
Media amerikane Axios raportoi se të dërguarit amerikanë do të takoheshin veçmas me Putinin dhe Zelenskyn
Kushner dhe Witkoff e kanë vizituar disa herë Rusinë, por bisedimet e së dielës do të jenë të parat e tyre në Ukrainë.
Nuk është e qartë se si do të udhëtojnë të dërguarit amerikanë nga Moska në Kiev.
Hapësira ajrore e Ukrainës është e mbyllur që nga nisja e pushtimit të plotë rus në shkurt të vitit 2022.
The post Të dërguarit e Trumpit takohen me Putinin, në fokus përfundimi i luftës në Ukrainë appeared first on Gazeta Express.
