Mëngjesin e së shtunës, oborri i Gjimnazit “Sami Frashëri” në Prishtinë u mbush me maturantë që po përgatiteshin për t’iu nënshtruar afatit të dytë të Testit të Maturës.
Me vete, ata kishin dokumentet e nevojshme për të hyrë në provim.
Ndërsa para fillimit të testimit, drejtori i kësaj shkolle ua rikujtoi edhe një herë rregullat që duhet t’i respektojnë gjatë provimit.
“Telefonat janë të ndaluar. Megjithatë, nëse i keni marrë me vete, nëse s’keni zgjidhje tjetër, është vendi poshtë ku i dorëzoni. Por, ta dini, asnjë përgjegjësi shkolla nuk e merr, sepse ju e keni ditë që me telefon nuk duhet me ardhë në test”, u shpreh Betim Sylejmani-drejtor gjimnazit “Sami Frashëri”.
Por, edhe kësaj here, grupet e kopjimit veçse ishin krijuar, rrjedhimisht pyetjet e testit u publikuan online, nga qendra të ndryshme, gjatë gjithë kohës sa është mbajtur testi.
E pas rreth dy orë e gjysmë testimi, maturantët nisën të dalin një nga një nga qendrat e testimit.
Njëri prej tyre, Sad Vezdikllar, tha se testi nuk ishte i lehtë, por shpreson se ka arritur ta kalojë.
“Mirë ka shku testi. Testi ka qenë pak i vështirë, po për herë të parë, pasi që herën e parë ma kishin shkruar të e-Kosova emrin gabim dhe tash në afatin e dytë. Jo, me kopju s’na kanë lanë hiç, na këqyrshin mirë, s’kemi mujt me kopju. Po besoj që e kaloj”, tha Sad Vezdiklar-nxënës.
Sipas drejtorit të Gjimnazit “Sami Frashëri”, procesi i testimit në këtë qendër ka kaluar pa probleme sa i përket organizimit.
Në dhjetë sallat e testimit kanë qenë të angazhuar edhe zyrtarë të Inspektoratit të Arsimit, ndërsa drejtori tha se nuk është evidentuar asnjë shkelje.
“Po, në Gjimnazin ‘Sami Frashëri’, testit iu kanë nënshtruar 150 nxënës, gjithsej rreth dhjetë salla të testimit. Gjithçka ka qenë në rregull sa i përket çështjeve organizative, tashmë edhe veç ka përfunduar provimi. Inspektorati i Arsimit ka qenë prezent që nga fillimi i testit, po ashtu edhe Komisioni i Maturës në kuadër të kësaj qendre. Nuk ka pasur ndonjë evidentim apo ndonjë shkelje nga administruesit apo nga komisioni dhe po mendoj që ka qenë në rregull”, u shpreh drejtori i gjimnazit.
Në këtë afat të dytë të Testit të Maturës po marrin pjesë gjithsej 5 mijë e 480 maturantë.
Rezultatet e testit pritet të publikohen më 1 shtator përmes platformës elektronike e-Kosova.
