Oyo Nyimba, një monark fisnor ugandez që magjepsi liderët botërorë pasi u ngjit në fronin e tij të lashtë si fëmijë, ka vdekur në moshën 34-vjeçare.
Vdekja e mbretit të Tooros u njoftua herët të premten në mëngjes nga kryeministri Calvin Rwomiire Akiiki.
“Vazhdimësia e Kurorës është e garantuar”, thuhej në deklaratën e kryeministrit të Tooros.
“Shkëlqesia e Tij lë pas një Princ si trashëgimtar, identiteti i të cilit do të bëhet i ditur zyrtarisht në kohën e duhur, në përputhje me traditat dhe zakonet e Mbretërisë së Tooros”, u bë e ditur.
Të premten u shprehën ngushëllime ndërsa lajmi mbërriti te ugandezët e tronditur, të cilët nuk ishin në dijeni se monarku i tyre po merrte trajtim jashtë vendit për një problem shëndetësor që nuk ishte bërë publik.
Autoritetet në Tooro kishin siguruar më parë publikun se Oyo ishte ende gjallë, por në gjendje kritike, duke bërë që shumë njerëz të përballeshin papritur me vdekjen e tij në një moshë kaq të re.
“Kjo është shumë e vështirë për t’u kuptuar”, tha zëvendëskryetari i Parlamentit, Thomas Tayebwa.
Mbreti Oyo, siç njihej më së shumti, u kurorëzua në vitin 1995, në moshën trevjeçare, pas vdekjes së babait të tij dhe ishte objekt adhurimi për qindra mijëra nënshtetasit e tij.
Gjatë kurorëzimit, ai iu nënshtrua një sërë ritualesh fisnore dhe u shpall Mbreti Oyo Nyimba Kabamba Iguru Rukidi IV.
Oyo mbante titullin jozyrtar të mbretit më të ri në botë dhe ishte një figurë magjepsëse edhe për liderët botërorë që e takonin në ngjarje kombëtare. Ai udhëhoqi popullin e tij përmes regjentëve të caktuar nga mbretëria, derisa mbushi moshën 18 vjeç, shkruan the Independent.
Udhëheqësi libian Muammar Gaddafi ishte një prej atyre që u miqësua me familjen mbretërore të Tooros, duke i trajtuar sikur të ishin pjesë e familjes së tij të gjerë.
Gaddafi bëri disa vizita në Ugandë dhe për vite me radhë mbështeti Oyon dhe nënën mbretëreshë, përpara vdekjes së liderit libian në tetor 2011.
Me kalimin e viteve, Oyo u njoh si një njeri i qetë që mbronte privatësinë e tij. Ai vdiq i pamartuar dhe konsiderohej gjerësisht beqari më i kërkuar i Ugandës.
Tooro është një nga mbretëritë e lashta të Ugandës. Ato u ndaluan pas pavarësisë nga sundimi kolonial britanik nga një president republikan, i cili tha se dëshironte të bashkonte vendin. Mbretëritë tradicionale u rikthyen në vitin 1993.
Megjithëse nuk kanë autoritet politik dhe ligjërisht nuk lejohen të përfshihen në politikën partiake, monarkët kanë autoritet si mbrojtës të kulturës fisnore.
Selia e mbretërisë së Oyo-s ndodhet në një qytet të largët në Ugandën perëndimore, pranë kufirit me Kongon. Populli i Oyo-s njihet si Batooro.
The post “Mbreti më i ri në botë”, vdes pas një sëmundje “sekrete” appeared first on Gazeta Express.
