Dy qytetarë kanë treguar ndershmëri dhe përgjegjësi qytetare duke dorëzuar në polici para, dokumente dhe një portofol që i kishin gjetur në rrugë.
Më 25 gusht, qytetari B.S., 43-vjeçar, ka dorëzuar në Stacionin Policor në Mitrovicën e Veriut një shumë parash dhe dokument identifikimi, të gjetura në rrugën “Zoran Dzindzic”.
Pas verifikimeve nga zyrtarët policorë, është identifikuar pronari i tyre, R.P., 75-vjeçar. Atij i janë kthyer dokumenti dhe paratë e gjetura, në vlerë prej 210 eurosh dhe 120 dinarësh.
Ky nuk është rasti i vetëm. Më 29 korrik, në të njëjtën rrugë, qytetari N.M., 25-vjeçar, kishte gjetur një portofol me 80 euro, 28 mijë dinarë dhe dokumente identifikuese, të cilat i kishte dorëzuar në polici.
Pas veprimeve policore, është identifikuar pronari i portofolit, K.D., 16-vjeçar, të cilit më pas i janë kthyer paratë dhe dokumentet.
Drejtoria Rajonale e Policisë në Mitrovicën e Veriut ka vlerësuar lart veprimet e dy qytetarëve, duke i cilësuar ato si shembull të ndershmërisë, përgjegjësisë qytetare dhe bashkëpunimit me Policinë e Kosovës.
The post Gjetën para dhe dokumente, dy qytetarë në Mitrovicën e Veriut i dorëzuan në polici appeared first on Gazeta Express.
