Policia e Shqipërisë ka njoftuar se ka arrestuar në Durrës një shtetas nga Kosova, i cili ishte shpallur në kërkim ndërkombëtar dhe ishte dënuar nga Gjykata e Prishtinës me 3 vjet e 6 muaj burgim.
Shtetasi me inicialet E. Zh., 57 vjeç, i lindur në Kosovë, u lokalizua dhe u arrestua provizorisht në lagjen nr. 13 në Durrës, në kuadër të operacionit policor të koduar “Ëanted 38”.
Njoftimi i policisë:
Durrës/ Operacione të njëpasnjëshme për lokalizimin dhe kapjen e shtetasve të shpallur në kërkim ndërkombëtar.
Finalizohet operacioni policor i koduar “Wanted 38”.
Lokalizohet dhe arrestohet provizorisht, me qëllim ekstradimi, një shtetas i dënuar në Kosovë me 3 vjet e 6 muaj burgim.
Si rezultat i informacioneve të siguruara në rrugë operative dhe i veprimeve të shpejta policore, specialistët e Seksionit për Mbështetjen Operacionale të Hetimit, pranë DVP Durrës, finalizuan operacionin policor të koduar “Wanted 38”.
Në kuadër të operacionit, në lagjen nr. 13, Durrës, u lokalizua dhe u arrestua provizorisht, me qëllim ekstradimi, shtetasi E. Zh, 57 vjeç, lindur në Kosovë.
Ky shtetas ishte shpallur në kërkim, pasi Gjykata e Prishtinës, Kosovë, e ka dënuar me 3 vjet e 6 muaj burgim, për veprat penale “Falsifikimi i dokumenteve” dhe “Mashtrimi”, të parashikuara nga legjislacioni penal i Kosovës.
Interpol Tirana, në bashkëpunim me autoritetet homologe të Kosovës, vijon procedurat për ekstradimin e këtij shtetasi.
The post Shtetasi kosovar arrestohet në Durrës me qëllim ekstradimi, ishte i dënuar me 3 vjet e 6 muaj burgim nga gjykata në Prishtinë appeared first on Gazeta Express.
