Grupi Parlamentar i PDK-së do të mblidhet sot, nga ora 11:00, në sallën e Kuvendit të Kosovës, duke kërkuar vazhdimin e seancës konstituive dhe përfundimin e procesit të konstituimit të Kuvendit. Aksionit pritet t’i bashkohet edhe AAK-ja.
PDK ka bërë të ditur se i është drejtuar sërish kryesuesit të seancës konstituive, Avni Dehari, me kërkesën që të thërrasë vazhdimin e seancës, duke iu referuar Kushtetutës, aktgjykimeve të Gjykatës Kushtetuese dhe Rregullores së Kuvendit.
Deputetja e AAK-së, Albana Bytyqi, ka konfirmuar se përfaqësuesit e kësaj partie do t’i bashkohen PDK-së, duke theksuar se AAK insiston në përfundimin e procesit të themelimit të institucioneve.
Afati kushtetues për konstituimin e Kuvendit kishte përfunduar më 7 gusht. Seanca e fundit ishte mbajtur më 8 gusht, ndërsa që nga ajo kohë nuk është thirrur vazhdimi i saj.
Ndërkohë, përfaqësitë diplomatike në Kosovë u kanë bërë thirrje liderëve politikë që t’i japin fund krizës politike dhe të mundësojnë funksionalizimin e institucioneve.
