Ushtruesja e detyrës së presidentes së Kosovës, ua dërgoi ftesat për takim liderëve të partive opozitare.
Mirëpo, deri më tani, dy nga partitë opozitare, PDK dhe AAK, e refuzuan këtë ftesë.
Partia Demokratike në një konferencë për media të mbajtur sot, refuzuan ftesën e Haxhiut pasi sipas tyre, është manipulim politik diskutimi për shtyrjen e afateve.
“Pra, është një manipulim i radhës. Zonja Albulena Haxhiu, më mirë kishte me qenë t’i kishte shkruar letër zotit Avni Deharit, që ta thërrasë Kuvendin, sepse çdo pushtet në Kosovë, çdo funksion në Kosovë, politik, funksionon dhe bazohet në Kuvendin e Republikës së Kosovës. Dhe Kuvendi i Republikës së Kosovës është i suspenduar”, deklaroi nënkryetari i PDK-së, Uran Ismaili.
Ndërsa kryetari i Aleancës, Ardian Gjini, pas ftesës së Albulena Haxhiut reagoi në facebuk duke thënë se nuk është presidente e zgjedhur dhe se nuk ka mandat ta luajë rolin unifikues të spektrit politik.
Duke shtuar se qëllimi i saj dhe i Kurtit është që duan ta zvarrisin këtë bllokadë deri te data që iu konvenon që të mbahen zgjedhjet.
Lidhur me ftesat e dërguara nga ushtruesja e detyrës së presidentes, Albulena Haxhiu, drejt partive opozitare, analisti politik Jeton Halimi i cilëson si jo të sinqerta dhe jo serioze për zgjidhje.
“Unë mendoj që duhet të ketë një ftesë tamam serioze dhe jo për kalkulime politike dhe jo për interesa”, tha Halimi.
Sipas tij, Kurti duhet të bëjë një marrëveshje politike me njërën nga partitë opozitare dhe jo të ketë vetëm kalkulime politike.
“Opozita e ka kuptuar shumë qartë se oferta e zotit Kurti nuk është serioze dhe nuk duan të bien pre e mashtrimeve. LDK-ja kishte marrëveshje në parim, e kanë pranuar edhe Abdixhiku edhe Kurti. Ajo nuk u bë sepse kërkesat e LDK-së ishin presidenti dhe jo kryeparlamentari”, shtoi Halimi.
Ndërsa, sipas analistit politik Ardian Bytyqi, ushtruesja e detyrës së presidentes do të duhej të luante një rol më proaktiv, pasi që tani vetëm se jemi në një terren kushtetues të pashkelur më parë.
“Subjektet opozitare do të duhej të uleshin me mazhorancën, në këtë rast me Lëvizjen Vetëvendosje, që të paktën të diskutonin për krijimin e dy institucioneve, siç është Kuvendi dhe Qeveria. Presidenca mbase është temë në vete, mirëpo në këtë rast edhe partitë opozitare do të duhej t’i përafronin qëndrimet, qoftë edhe ndoshta për një emër konsensual”, theksoi Bytyqi.
Përderisa partitë opozitare vazhdojnë ta refuzojnë dialogun e propozuar, mbetet e paqartë nëse palët do të arrijnë një marrëveshje për tejkalimin e ngërçit institucional.
