Një zbulim i pazakontë është bërë gjatë rinovimit të një ndërtese në Saint-Gilles-lez-Termonde, në Flandrën Lindore të Belgjikës, ku punëtorët kanë gjetur një sasi të madhe ari të fshehur brenda një muri. Vlera e thesarit vlerësohet paraprakisht në rreth 9 milionë euro.
Sipas raportimeve të mediave, punëtorët po instalonin tuba në bodrumin e ndërtesës kur hasën në një kuti të fshehur në mur. Pas hapjes së saj, brenda u gjetën copëza ari, monedha dhe shufra të pajisura me numra identifikues.
Media belge HLN raporton se, sipas vlerësimeve fillestare, vlera e përgjithshme e arit mund të arrijë në rreth 9 milionë euro.
“Gjatë punës, punëtorët po instalonin tuba. Pikërisht atëherë bënë këtë zbulim të jashtëzakonshëm”, deklaroi Geert Hillaert nga CAW East Flanders, organizata e mirëqenies sociale që është pronare e ndërtesës.
Objekti po i nënshtrohet një rinovimi të plotë dhe është planifikuar që hapësirat e tij të shndërrohen, ndër të tjera, në studio dhe zyra.
Menjëherë pas gjetjes së arit, kompania kontraktuese njoftoi pronarin e ndërtesës dhe më pas policinë. Hillaert tha se kjo procedurë është pjesë e protokollit që zbatohet në raste të tilla. Edhe kreu i policisë lokale, Patrick Face, konfirmoi se në ndërtesë ishte gjetur një sasi e konsiderueshme ari.
Autoritetet tashmë kanë nisur hetimet për të zbuluar origjinën e thesarit, pronarin e tij dhe mënyrën se si ari përfundoi i fshehur brenda murit.
Fillimisht do të hetohet nëse ari mund të ketë lidhje me ndonjë aktivitet kriminal të së kaluarës. Nëse kjo mundësi përjashtohet, autoritetet do të përpiqen të identifikojnë pronarin ligjor ose trashëgimtarët e tij. Sipas Hillaert, përcaktimi i pronësisë mund të jetë një proces kompleks dhe të zgjasë disa vite.
Nëse nuk gjendet ndonjë lidhje me aktivitete kriminale dhe njëkohësisht nuk identifikohet pronari ligjor, do të duhet të përcaktohet se kujt i takon thesari me vlerë miliona euro.
Për momentin, as CAW East Flanders, si pronare e ndërtesës, dhe as kompania, punëtorët e së cilës zbuluan arin, nuk e dinë nëse mund të pretendojnë një pjesë të tij apo ndonjë shpërblim për gjetjen.
Deri në përfundimin e hetimeve, ari i është dorëzuar një institucioni kompetent në Bruksel, ku po ruhet nën masa të rrepta sigurie.
