Postin e Presidentit e donin për vete, e për të negociuan disa herë.
Por pas disa takimesh, LDK-ja i dha fund çdo diskutimi politik me Vetëvendosjen.
Lumir Abdixhiku doli nga takimi tri orësh me grupin parlamentar të LDK-së me një qëndrim të prerë.
Partia e tij nuk do më asnjë pozitë për vete në këmbim të zgjidhjes së krizës institucionale.
“LDK-ja heq dorë nga çdo kërkesë për pjesëmarrje në qeveri. S’e duam asnjë ministri. Le t’i mbajë Lëvizja Vetëvendosje. Heqim dorë nga kërkesa për kryetar të Kuvendit dhe më e rëndësishmja edhe nga kërkesa për të udhëhequr postin e presidentit”, ka thënë Abdixhiku.
Sipas Abdixhikut, oferta që i është bërë LDK-së nga Vetëvendosje ishte nënvlerësuese, dhe se pranimi i saj do ta bënte LDK-në të dukej vetëm si “dekor” i VV-së.
E nënshtrimin, kreu i LDK-së thotë se nuk e pranon.
“Meqë LVV-ja po vlerëson se s’ka nevojë për LDK-në si partnere s’do ta ketë as si dekor. Në rrethana të tilla, do të qëndrojmë në opozitë, ku qytetarët na kanë vendosur dhe do të ushtrojmë këtë përgjegjësi me dinjitet”,kashtuar Abdxhiku.
Ndonëse hoqën dorë nga marrëveshja politike, Abdixhiku thotë se partia është e gatshme të kontribuojë që Presidenti i ardhshëm të jetë një emër mbi partitë, një figurë që mbron Republikën dhe Kushtetutën.
“Le të zgjedhim një president që është i Republikës së Kosovës. LVV-ja le ta formojë dhe udhëheq Qeverinë me 61 deputetët e koalicionit të saj, le ta kenë të gjithë ekzekutivin”, ka shtuar Abdixhiku.
Për këtë, Abdixhiku, paralajmëroi kontakte me partitë e tjera shqiptare.
