Kryetari i Partisë Demokratike të Kosovës (PDK), Bedri Hamza, pas përfundimit të seancës së parë konstituive të Kuvendit të Kosovës, të dalë nga zgjedhjet e parakohshme parlamentare të 7 qershorit, ka kritikuar kryetarin e Lëvizjes Vetëvendosje (LVV), Albin Kurtin për mënyrën se si është menaxhuar procesi i konstituimit të institucioneve.
Hamza tha se zhvillimet e seancës dëshmojnë mungesë serioziteti dhe përgjegjësie nga subjekti që ka dalë i pari në zgjedhje.
“Siç edhe përcollët, kjo është një shenjë e mungesës së seriozitetit dhe përgjegjësisë nga partia që ka fituar më shumë mandate në zgjedhjet e fundit. Thirret seanca pothuajse në ditën e fundit dhe në fund dalin, mbajnë fjalime politike, abuzojnë me ulësen e kryesuesit dhe kërkojnë ende kohë. Këto sjellje duhet të përfundojnë dhe vendit duhet t’i japin institucionet. E kemi deklaruar rolin tonë, jemi parti në opozitë. Kushtetuta është e qartë, Kuvendi duhet të konstituohet brenda afatit 30-ditor nga momenti i certifikimit të zgjedhjeve”, deklaroi Hamza.
Në lidhje me situatën e krijuar reagoi edhe shefi i Grupit Parlamentar të Aleancës për Ardhmërinë e Kosovës (AAK), Besnik Tahiri, i cili akuzoi Lëvizjen Vetëvendosje për zvarritje të procesit të konstituimit të institucioneve.
Tahiri tha se qytetarët janë dëshmitarë të një situate që, sipas tij, është e dëmshme për vendin.
“Tani jeni dëshmitarë të një tendence të skajshme, jashtëzakonisht të dëmshme për Kosovën. Më 8 korrik janë certifikuar rezultatet e zgjedhjeve, ndërsa sot del kryetari i LVV-së dhe u thotë qytetarëve të Kosovës se na duhet ende kohë. Por a nuk patët 30 ditë kohë? Problemi kryesor nuk është te Qeveria e as te Kuvendi, por te Presidentja. A po doni të krijoni edhe një rast në Gjykatën Kushtetuese? Kjo është vetëm për të blerë pak kohë që t’i marrin tri institucionet, e ato nuk i takojnë një partie politike, sepse nuk i ka votat. Asnjë fjalë nuk u tha për gjashtë kërkesat. Sot del e flet në mënyrë të papërgjegjshme duke thënë se na duhet ende kohë”, u shpreh Tahiri. /Telegrafi/
