Kryetari i Prishtinës, Përparim Rama, ka reaguar pas aksidentit në një vendpunishte në rrugën “Holger Petersen”, ku si pasojë e rrëzimit të një vinçi një punëtor humbi jetën, ndërsa një tjetër mbeti i lënduar.
Rama ka shprehur ngushëllime për familjen e viktimës dhe ka uruar shërim të shpejtë për të lënduarin, duke theksuar se hetimet për rastin po zhvillohen nga organet kompetente.
“Me pikëllim të thellë mora lajmin për humbjen tragjike të jetës së një punëtori në aksidentin e sotëm në një vendpunishte ndërtimore në rrugën ‘Holger Petersen’. Në emrin tim dhe të Kryeqytetit, i shpreh ngushëllimet më të sinqerta familjes, ndërsa të lënduarit i uroj shërim sa më të shpejtë”, ka shkruar Rama në Facebook.
Kryetari i Prishtinës ka falënderuar ekipet emergjente për reagimin në vendin e ngjarjes.
“Falënderoj Brigadën Profesionale të Zjarrfikjes dhe Shpëtimit, Policinë e Kosovës, ekipet e Urgjencës Mjekësore, Njësinë për Reagim të Shpejtë dhe Siguri, si dhe Drejtorinë për Siguri dhe Emergjenca për reagimin e menjëhershëm dhe profesionalizmin e treguar në këtë ndërhyrje të vështirë”, ka deklaruar ai.
Rama ka thënë se vlerësimi i respektimit të standardeve të sigurisë dhe mbrojtjes në punë është përgjegjësi e Inspektoratit Qendror të Punës, ndërsa ka kërkuar që hetimet të zbardhin të gjitha rrethanat e rastit.
“Rrethanat e aksidentit po hetohen nga organet kompetente. Vlerësimi i respektimit të standardeve të sigurisë dhe mbrojtjes në punë është kompetencë e Inspektoratit Qendror të Punës, institucion në kuadër të nivelit qendror, dhe presim që hetimet të zbardhin plotësisht shkaqet dhe përgjegjësitë për këtë rast”, ka shkruar Rama.
Ai ka theksuar se siguria në vendin e punës duhet të jetë prioritet i panegociueshëm.
“Humbja e një jete në vendin e punës është një tragjedi që duhet të na rikujtojë të gjithëve se siguria në punë duhet të jetë prioritet i panegociueshëm dhe standard që respektohet në çdo vendpunishte”, ka përfunduar Rama.
