Në orën 13:30, në Pallatin e Drejtësisë në Prishtinë, do të shpallet aktgjykimi ndaj Milorad Gjokoviqit, i akuzuar për krime lufte gjatë periudhës 1998-1999 në Kosovë.
Trupi gjykues pritet të japë vendimin në përfundim të procesit gjyqësor, në të cilin Gjokoviq është përballur me akuza për krime lufte kundër popullatës civile.
Shpallja e aktgjykimit pritet të përcaktojë epilogun e këtij rasti, i cili është trajtuar nga organet e drejtësisë së Kosovës në kuadër të ndjekjes penale për krimet e luftës.
Në Gjykatën Themelore në Prishtinë janë dhënë fjalët përfundimtare në rastin ndaj të akuzuarit për krime lufte, Milorad Gjokoviq, ku Prokuroria Speciale e Republikës së Kosovës ka kërkuar që ai të shpallet fajtor dhe të dënohet me dënimin maksimal të paraparë me ligj.
Prokurori i rastit, Ilir Morina, tha se gjatë procesit gjyqësor është provuar përtej çdo dyshimi se Gjokoviq, i njohur me nofkën “Mici”, në bashkëkryerje me pjesëtarë të tjerë të forcave policore dhe paramilitare serbe, ka marrë pjesë në kryerjen e vrasjeve në fshatin Ozdrim dhe fshatrat përreth më 7 maj 1999.
“Kjo çështje nuk flet për njerëzit e panjohur, për njeri-tjetrin, ajo flet për bashkëfshatarë për të pandehurin dhe viktimat. Ata ishin fqinj, i njihnin njëri-tjetrin, i njihnin shtëpitë e njëri-tjetrit. Por me 7 maj disa prej atyre që dikur ishin fqinj u bënë pjesë e një force të armatosur që solli vdekjen, vuajtjen dhe shkatërrimin. Prokuroria konsideron se është provuar përtej çdo dyshimi se i pandehuri, i njohur me nofkën Mici, në bashkëkryerje me pjesëtarë të tjerë të forcave policore paramilitare serbe ka marrë pjesë në kryerjen e vrasjeve në fshatin Ozdrim dhe fshatrave përreth më 7 maj 1999”, tha ai.
Prokuroria kërkon dënimin maksimal për Gjokoviqin, viktimat dhe familjet e tyre kërkojnë drejtësi
