Instituti Hidrometeorologjik i Kosovës ka lëshuar paralajmërim meteorologjik të nivelit portokalli për të gjithë territorin e vendit, duke paralajmëruar stuhi të fuqishme me bubullima gjatë së mërkurës, më 22 korrik.
Sipas IHMK-së, paralajmërimi është i vlefshëm nga ora 00:00 deri në 23:59, ndërsa gjatë kësaj periudhe priten zhvillime të fuqishme konvektive që do të sjellin stuhi lokale të shoqëruara me reshje intensive shiu, breshër dhe erëra të forta me karakter stuhish, njofton Dukagjini.
Instituti bën të ditur se kushtet atmosferike mund të shkaktojnë goditje të rrufesë me rrezik për njerëzit dhe kafshët, dëmtime në rrjetin elektroenergjetik dhe ndërprerje të furnizimit me energji elektrike, si dhe pengesa në sistemet e telekomunikacionit.
Po ashtu, paralajmërohet për mundësi të përmbytjeve të shpejta lokale në zonat me reshje intensive, dëmtime në objekte, automjete, infrastrukturë dhe kultura bujqësore, veçanërisht si pasojë e breshërit dhe erërave të forta.
IHMK-ja vlerëson gjithashtu se ekziston rrezik i shtuar për shpërthimin e zjarreve si pasojë e shkarkimeve atmosferike.
Instituti u ka bërë thirrje qytetarëve të shmangin qëndrimin në ambiente të hapura gjatë stuhive, të mos strehohen nën pemë të vetmuara, pranë shtyllave elektrike apo objekteve metalike, si dhe të mbrojnë automjetet dhe pronën nga breshëri dhe erërat e forta.
Po ashtu, qytetarëve u rekomandohet kujdes i shtuar në komunikacion për shkak të dukshmërisë së reduktuar dhe rrugëve të rrëshqitshme, si dhe të ndjekin njoftimet e institucioneve kompetente deri në përfundimin e periudhës së paralajmërimit.
