Mehmeti: Rama është Enveri Hoxha i dytë, ai nuk e paramendon Shqipërinë për shqiptarët

Publicisti shqiptar nga Maqedonia e Veriut, Kim Mehmeti, ka qenë i ftuar në emisionin “Këndi i Kimit” në Tëvë1.

Mehmeti, i cili është njohës i zhvillimeve politike në rajon i ka komentuar protestat që po zhvillohen në kryeqytetin shqiptar tash e 26-t ditë.

Shkrimtari i njohur ka lëshuar akuza të forta në drejtim të kryeministrit shqiptar, Edi Rama, të cilit po i kërkohet dorëheqja përpara ndërtesës së kryeministrisë.

“Kryeministri Rama është mësuar me protestat e Partisë Demokratike që e mbanin gjallë. Ata gjuanin me molotov, e ata ky u’a kthente me ujë. Ajo ka qenë një protestë ndryshe nga kjo e sotmja. Edi Rama nuk del nga zyra e tij, sepse e di se ku duhet të përfundojë. Pas zyrës duhet të shkojë pas grilave. Protestuesit duhet ta dinë se Kryeministria është zyra e tyre e jo e Ramës. Protestuesit duhet të jenë të vetëdijshëm se ajo është në zyra e tyre dhe duhet ta pastrojnë nga kjo qelbësirë. Rama vetëm këtë gjuhë e kupton”, ka deklaruar Kim Mehmeti për Tëvë1.

Ai ndër të tjera ka thënë se protesta në fjalë po e “dridh” Edi Ramën duke thënë se nuk ai nuk është mësuar me revoltë të tillë qytetare.

“Edi Rama para kryeministrisë vite më parë (21 janar 2011) ka dërguar protestues duhet i shtyrë që të vriten. Ai e konsideron atë protestë, por jo edhe këtë paqësoren. Nuk ka më kthim prapa. Edi Rama ëndërron Shqipëri pa shqiptarë, pa njerëz që reagojnë dhe që nuk i dhimbset toka që ky po e shet”, shtoi Mehmeti duke i vlerësuar lartë protestuesit për formën e protestës.

“Këta janë protestuesit më të mirë që i ka parë Evropa. Ne po dëshmojmë se kemi vlera. Ne nuk jemi rrugaç si Edi Rama. Ai është gjëja më e keqe që ka shqiptaria. Rinia në protestë tregoi se nuk e duron një plehër si Edi Rama”, pohoi ai.

Mehmeti e ka krahasuar Ramën me Enver Hoxhën.

“Edi Rama është Enveri Hoxha i dytë. Rama nuk e paramendon Shqipërinë për shqiptarët, por për të huajt. Ai thotë gjithmonë se duhet të sjellim të huaj që ndërtojnë resorte turistike. Ai ia ka dhënë çelësin e Tiranës, Goran Bregoviçit (këngëtarë serb). Rama nuk e di se ne shqiptarët jashtë Shqipërisë administrative, e duan shumë Shqipërinë dhe se për të kemi derdhur gjak, si ata në Kosovë, Maqedoninë e Veriut e Luginën e Preshevës. Ai vetëm pasi është bërë kryeministër, ka zbuluar se ka shqiptarë në Maqedoninë e Veriut”, ka thënë ndër të tjera publicist Kim Mehmeti.

Ndryshe, protesta masive në Shqipëri ka nisur si fillim nga ambientalistë dhe parti të vogla politike në Shqipëri që u shprehën kundër ndërtimit të një resorti ekskluzivë në Zvërnec të Vlorës, e që vlerësohet rreth 4 miliardë euro, me pretekstin e dëmtimit të natyrës. Filli i saj ishte largimi me dhunë nga një sigurim privat i një protestuesi në fshatin Zvërnec.

Protesta në ditët e fundit është bërë masive ku drejtuesit e saj kanë shpalosur edhe kërkesat e tyre e që e para është dorëheqja e kryeministrit Rama.

Për këtë protestë për herë të parë ka reaguar të mërkurën edhe presidenti i Shqipërisë, Bajram Begaj.