Presidenti francez Emmanuel Macron dhe kryeministri spanjoll Pedro Sánchez kanë kundërshtuar hapur planet për ngritjen e qendrave të deportimit të migrantëve jashtë Bashkimit Europian, duke u përplasur me një grup në rritje shtetesh anëtare që mbështesin këtë qasje.
Gjatë një samiti të zhvilluar të premten, 19 liderë europianë nënshkruan një deklaratë të përbashkët ku kërkohet shfrytëzimi i plotë i legjislacionit të ri europian që mundëson krijimin e të ashtuquajturave “qendra kthimi” për migrantët, kërkesat e të cilëve për azil janë refuzuar.
Nisma mbështetet veçanërisht nga Danimarkë dhe Itali, të cilat kërkojnë që BE-ja të avancojë sa më shpejt me zgjidhje që përfshijnë vende të treta për menaxhimin e migracionit.
Megjithatë, Macron argumentoi se kjo politikë bie ndesh me vlerat themelore të Bashkimit Europian dhe nuk ka dëshmuar se funksionon në praktikë.
“Nuk mendoj se është efektive. Nuk kam parë askënd ta bëjë të funksionojë deri më tani”, tha presidenti francez, duke iu referuar edhe përpjekjeve të Italisë për të ngritur qendra migracioni në Shqipëri, të cilat sipas tij nuk kanë arritur rezultatet e pritshme. Franca nuk e mbështet këtë politikë. Jemi në favor të një politike kthimi më efektive, por nuk kam parë kurrë një qendër kthimi në një vend të tretë të funksionojë. Jam një mbështetës i madh i inovacionit, por jam shumë i kujdesshëm kur flitet për inovacion në vlera dhe të drejta të njeriut”, u shpreh Macron.
Ndërkohë, Sanchez, një kritik i masave, tha se kampet e deportimit do të ishin një përgjigje “absolutisht joefikase” dhe “e pavlerë” ndaj migracionit të parregullt.
Është një mirazh, nëse do ta quani kështu, që thjesht do të shpërdorojë burimet ekonomike, dhe Evropa nuk ka shumë. Së dyti, u dërgon një mesazh të gabuar atyre vendeve të origjinës dhe tranzitit me të cilat duhet të bashkëpunojmë, të bashkëpunojmë dhe të tregojmë empati ndaj tyre”, tha ai.
Qëndrimi i Francës dhe Spanjës nxjerr në pah ndarjet brenda BE-së për mënyrën se si duhet të trajtohet migracioni i parregullt, në një kohë kur disa vende kërkojnë masa më të ashpra, ndërsa të tjera paralajmërojnë për pasojat ligjore dhe humanitare të zhvendosjes së migrantëve jashtë kufijve të bllokut.
