Qeveria në detyrë e Kosovës ka zhvilluar një mbledhje elektronike, në të cilën ka miratuar disa vendime që lidhen me emërime institucionale, financimin e projekteve kapitale dhe obligimet ndaj institucioneve financiare ndërkombëtare.
Një nga vendimet kryesore ka qenë emërimi i anëtarëve të rinj të Këshillit të Kosovës për Raportim Financiar.
Në përbërjen e re të këtij organi janë emëruar Rrezarta Korbaj si kryesuese, si dhe Kimete Zekaj, Vlora Prenaj, Samir Lleshi, Fadil Sallteku, Kosovare Demi-Rama dhe Altin Sahiti si anëtarë.
Në të njëjtën mbledhje, ekzekutivi ka aprovuar kërkesën e Ministrisë së Industrisë, Ndërmarrësisë, Tregtisë dhe Inovacionit për ndarjen e 122 mijë eurove për realizimin e dy projekteve kapitale. Fondet do të dedikohen për renovimin e objektit të Qendrës së Panairit në Bërnicë dhe për zhvillimin e Regjistrit për Pronarët Përfitues.
Po ashtu, Qeveria ka dhënë dritën e gjelbër për pagesën prej 154 mijë eurosh ndaj Bankës Evropiane për Rindërtim dhe Zhvillim (BERZH), si pjesë e rritjes së kuotës së kapitalit të Republikës së Kosovës në këtë institucion financiar ndërkombëtar.
