Dikur në shtëpi, sot pranë kontejnerëve.
Divanet dhe mobiliet e vjetra po vazhdojnë të përfundojnë në hapësira publike në Prishtinë.
E për qytetarët, kjo situatë është bërë shqetësuese.
Andaj, ata po kërkojnë më shumë organizim për largimin e tyre.
“Është pa përgjegjësi e qytetarëve, por edhe grumbullimi duhet me qenë pak i planifikum. Për shembull, siç ka qenë përpara, do kontejnerë që kanë ardhur çdo dy javë edhe i kanë qit këto mbeturinat vëllimore, mobilet të cilat janë jashtë përdorimit. Ish kon mirë prapë me u aktivizu që ato me u hudh e mbrenda ditës me u marrë. Kështu që ata qytetarë, ata që s’kanë ndërgjegje, po i lënë kështu edhe po i japin ambientit një hije të keqe. Papastërtia mundet me u përhapë, ndonjë sëmundje infektive”, shprehet Nexhmie Cubolli -qytetare
Kundër personave që hedhin mbeturina të tilla në hapësira publike janë paraparë edhe gjoba deri në 500 euro.
Por, për qytetarët, vetëm ndëshkimi nuk është zgjidhje.
“Nuk është zgjidhje. Ti mas pari duhesh me i gjetë zgjidhje ku t’i çon ajo. Unë e kom pa njeriun me traktor duke e zbrazur atë materialin ndërtimor me copa betoni, i zbrazke në kontejner… Është me të vërtetë e tmerrshme veç me pa me sy sa është tronditëse, sa kauqa, sa dyshekë. Kjo është për çdo kritik”, thotë Hysni Zuka-qytetar.
Megjithatë, nga Komuna thonë ndryshe.
Sipas shefit të Rendit Komunal, Alban Ymeri, shqiptimi i gjobave ka ndikuar në uljen e rasteve të hedhjes së mbeturinave në vende publike.
“Po çdo herë gjobat janë publikuar dhe ky ka qenë një mesazh për secilin qytetarë që t’i përmbahet rregullave të përcaktuara nga ana e komunës dhe mbeturina të hudhen vetëm në kontejnerët adekuat, por edhe në mbetjet inerte ose mobile të ndryshme që i kanë në deponinë e caktuar nga ana e komunës…. Kemi shumë raste të gjobave që janë identifikuar dhe janë gjobitë. Kemi mbi 50 raste, në varësi të shumave të ndryshme që shqiptohen, nga 100 euro deri në 800 euro, nga ana e inspektorëve”, thotë Ymeri.
Në lidhje me mbeturinat vëllimore, Komuna e Prishtinës ka krijuar edhe platformën “mbeturinat.com”.
Përmes saj, qytetarët mund të kërkojnë falas largimin e mbeturinave të mëdha nga shtëpitë e tyre.
