Studiuesi i filozofisë politike, Latif Mustafa, ka deklaruar se partitë opozitare në Kosovë janë duke reflektuar mbi arsyet pse vota e abstenimit ndaj Lëvizjes Vetëvendosje (LVV) nuk është kanalizuar tek ato dhe pse ende nuk konsiderohen alternativë e besueshme për qytetarët.
Në emisionin “Këndi i Debatit” në Tëvë1, Mustafa ka thënë se opozita ka arritur në përfundimin se zgjedhjet e shpeshta mund të ndikojnë negativisht te partia më e madhe në vend.
“Sot kemi ardhur në një moment kur opozita e ka kuptuar një fakt: nëse e çojmë vendin sa më shpesh në zgjedhje, dalja e qytetarëve do të jetë gjithnjë e më e vogël. Sa më e vogël të jetë pjesëmarrja në zgjedhje, aq më shumë do të goditet partia e madhe dhe ne do ta ndërtojmë një narrativë të shpëtimtarit, duke u konsoliduar më mirë. Partitë opozitare janë duke reflektuar se përse vota e abstenimit ndaj Lëvizjes Vetëvendosje nuk është orientuar drejt tyre dhe përse ato ende nuk po konsiderohen alternativë e besueshme për qytetarët”, ka deklaruar Mustafa.
Ai ka paraqitur edhe dy skenarë të mundshëm për zhvillimet politike në vend.
Sipas tij, nëse Vetëvendosje i nis vetë proceset politike, vendi mund të përballet me krizë.
Ndërsa, nëse partia në pushtet ofron një paketë për daljen nga kriza, atëherë mund të hapet diskutimi për zgjidhje të tjera politike.
“Unë kështu po e shoh situatën. Janë dy skenarë të mundshëm: nëse Lëvizja Vetëvendosje i nis vetë proceset, atëherë vendi mund të përballet me krizë. Por, nëse që tani fillon të ofrojë zgjidhje dhe daljen nga kriza e sheh si një paketë të plotë, atëherë mund të hapet diskutimi për alternativa të tjera. Madje, mund të rikthehet në konsiderim edhe emri i Feride Rushitit për presidente, por kjo do të varet nga LVV-ja”, është shprehur ai./teve1.info/
