Kryetari i Ferizajt, Agim Aliu, ka reaguar pas publikimit të rezultateve preliminare të zgjedhjeve nga Komisioni Qendror i Zgjedhjeve, duke uruar subjektin politik fitues, Lëvizja Vetëvendosje!.
Përmes një postimi publik, Aliu ka vlerësuar procesin zgjedhor si të qetë, demokratik dhe në shërbim të demokracisë, ndërsa ka shprehur urimin që vendi të ketë sa më shpejt institucione funksionale dhe në shërbim të qytetarëve.
“Uroj subjektin politik fitues të këtyre zgjedhjeve – Lëvizjen Vetëvendosje!, duke uruar që sa më shpejt të kemi institucione funksionale dhe në shërbim të qytetarëve. Një proces zgjedhor i qetë, demokratik e në shërbim të demokracisë”, ka shkruar ai.
Kryetari i Ferizajt ka falënderuar gjithashtu strukturat, aktivistët dhe mbështetësit e Partia Demokratike e Kosovës për angazhimin dhe kontributin e tyre gjatë procesit zgjedhor.
Aliu ka theksuar se pret që përfundimi dhe certifikimi i procesit zgjedhor të reflektohen në përmbushjen e pritjeve të qytetarëve dhe në angazhimin për avancimin e vendit.
“Uroj që përfundimi i procesit zgjedhor dhe certifikimi i tij të reflektojë në përmbushjen e pritjeve të qytetarëve dhe angazhim në dobi të ecjes përpara të vendit”, ka përfunduar ai.
