Vera e kaluar solli shumë entuziazëm te tifozët e Juventusit për afrimin e Edon Zhegrovës.
Fantazia, teknika dhe aftësia për ta bërë diferencën në situata një kundër një i kishin bindur drejtuesit bardhezi të investonin te talenti kosovar, i konsideruar si një lojtar me cilësi të veçanta në repartin ofanziv.
Megjithatë, sezoni i parë i Zhegrovës në Torino nuk shkoi sipas pritshmërive.
Lëndimet dhe mungesa e vazhdimësisë ndikuan ndjeshëm në paraqitjet e tij, ndërsa sulmuesi kosovar nuk arriti ta kishte ndikimin që pritej në një skuadër që kaloi një vit të komplikuar si në kampionat ashtu edhe në Evropë, shkruan “Tuttomercatoweb”.
Pavarësisht kritikave dhe zhgënjimit për rendimentin e sezonit të fundit, në ambientin juventin ekziston bindja se Zhegrova e meriton një mundësi të dytë.
Drejtuesit e klubit nuk e konsiderojnë situatën e tij të krahasueshme me atë të Lois Opendës, për të cilin është vendosur tashmë largimi nga projekti bardhezi.
Në Torino besojnë se potenciali teknik i 27-vjeçarit vazhdon të mbetet i paprekur.
Në mendjen e tifozëve është ende shumë i freskët ai duel i nëntorit 2024 mes Lillet dhe Juventusit, kur Zhegrova e kishte vënë në vështirësi të mëdha mbrojtjen bardhezi dhe në veçanti Juan Cabal, duke treguar të gjithë repertorin e tij teknik.
Pikërisht ajo paraqitje e kishte bindur klubin italian të shtynte fort për transferimin e tij.
Problemi kryesor i sezonit të fundit mbeti gjendja fizike.
Një dëmtim që e kishte penalizuar që në periudhën e fundit te Lille vazhdoi të ndikonte edhe në aventurën e tij në Serie A, duke mos e lejuar ta gjente ritmin dhe vazhdimësinë e nevojshme.
Për këtë arsye, drejtuesit e Juventusit janë të bindur se sezoni i ardhshëm mund ta japë një version krejt tjetër të futbollistit kosovar.
Ndryshe nga Openda, për të cilin klubi po kërkon zgjidhje në “pazar” pas paraqitjeve zhgënjyese dhe problemeve të përshtatjes, Zhegrova konsiderohet ende një investim teknik mbi të cilin mund të ndërtohet.
Administratori i deleguar Damien Comolli ka lënë të kuptohet se për disa lojtarë problemi ka qenë karakteri dhe aftësia për t’u integruar menjëherë në ambientin juventin, por në rastin e Zhegrovës ekziston ende besim për një rilindje sportive.
Sezoni i ardhshëm pritet të jetë vendimtar për të ardhmen e reprezentuesit të Kosovës.
Juventusi është gati t’ia japë një tjetër mundësi për t’i treguar vlerat që e kishin bërë një nga lojtarët më të admiruar të Ligue 1 në periudhën e tij te Lille.
