Policia e Athinës ka arrestuar dy mjekët, Ilias Theodoropoulos dhe Ioanna Gaka, të cilët ndodhen në qendër të hetimeve për vdekjen e këngëtarit Giorgos Mazonakis, pas përfundimit të kontrolleve në klinikën private, si dhe pas vlerësimit të provave të para të mbledhura.
Ndaj dy mjekëve është ngritur një dosje penale për veprën e ekspozimit që ka sjellë vdekjen.
Pas arrestimit, ata pritet të dalin përpara prokurorit kompetent, i cili, pasi të shqyrtojë provat e deritanishme të dosjes, pritet të vendosë për ushtrimin e ndjekjes penale.
Duhet theksuar se deri në këtë fazë, në dosjen hetimore nuk është përfshirë raporti mjekoligjor, pasi autopsia dhe ekzaminimi mjekoligjor i trupit pritet të kryhen nesër. Në procedurë pritet të jetë i pranishëm edhe eksperti teknik, praninë e të cilit e ka kërkuar familja e këngëtarit.
Zhvillimi vjen vetëm pak orë pasi dy mjekët u shoqëruan në Drejtorinë e Sigurisë së Athinës, ku qëndruan pas kontrollit disaorësh të kryer në klinikë, në prani të një prokurori, një zyrtari të Drejtorisë së Hetimeve Kriminalistike dhe efektivëve të policisë greke të njësisë së njohur si “FBI-ja greke”.
Në Drejtorinë e Sigurisë së Athinës u paraqitën gjithashtu edhe motrat e këngëtarit të ndjerë, Maria dhe Vaso.
Më herët, policia greke kishte kryer edhe një kontroll në banesën e çiftit në Psihiko. /Panorama
The post Vdekja e këngëtarit grek Giorgos Mazonakis, dy mjekë nën hetim! Pritet autopsia e të ndjerit appeared first on Gazeta Express.
