Dhjetëra mijëra shtëpi në perëndim të Francës kanë mbetur pa energji elektrike, ndërsa vendi po përballet me një valë rekord të nxehti që pritet të arrijë kulmin të mërkurën.
Autoritetet franceze njoftuan se rreth 68 mijë shtëpi në rajonin e Bretanjës janë prekur nga ndërprerjet e energjisë, ndërsa furnizimi i plotë me rrymë nuk pritet të rikthehet para mbrëmjes së së mërkurës.
Mbi gjysma e territorit francez vazhdon të jetë nën alarmin e kuq për temperatura ekstreme. Sipas shërbimit meteorologjik francez, Météo France, temperaturat në jugperëndim të vendit mund të arrijnë deri në 43 gradë Celsius.
Franca përjetoi të martën ditën më të nxehtë të regjistruar ndonjëherë, me një temperaturë mesatare kombëtare prej 29.8 gradë Celsius. Në komunën Pissos, në rajonin Landes, termometri shënoi 44.3 gradë Celsius.
Po ashtu, nata nga e hëna në të martë ishte më e nxehta e regjistruar ndonjëherë në Francë, me një temperaturë mesatare prej 29.9 gradë Celsius në nivel vendi.
Vala e të nxehtit është përhapur edhe në pjesë të tjera të Evropës Perëndimore. Në Holandë është shpallur alarm portokalli për mot të rrezikshëm, ndërsa në Mbretërinë e Bashkuar janë lëshuar alarme të kuqe për temperatura që mund të arrijnë deri në 38 gradë Celsius të enjten.
Temperaturat pritet të kulmojnë në Holandë dhe Belgjikë të premten, ndërsa në Gjermani mund të arrijnë deri në 40 gradë Celsius gjatë fundjavës.
Ditët në vijim, vala e të nxehtit pritet të përfshijë edhe Evropën Lindore, ku paralajmërime për temperatura të rrezikshme janë lëshuar për vende si Polonia, Kroacia dhe Hungaria.
Deri më tani, Franca, Spanja dhe Italia janë vendet më të prekura nga kjo valë ekstreme e të nxehtit, raporton BBC.
Kryeministri francez ka bërë të ditur se të paktën 40 persona kanë humbur jetën në incidente të lidhura me temperaturat e larta që nga e enjtja e kaluar.
Ndërkohë, Météo France ka zgjeruar alarmin e kuq për katër rajone të tjera, duke e çuar në 58 numrin e rajoneve nën nivelin më të lartë të paralajmërimit, ndërsa 31 rajone të tjera mbeten nën alarm portokalli.
