Nënkryetari i Partisë Demokratike të Kosovës dhe numri dy në listën e kësaj partie për zgjedhjet e parakohshme parlamentare të 7 qershorit, Uran Ismaili, përmes një videoje të publikuar në rrjetet sociale, ka ndarë ankesën e një qytetareje për, siç thotë ajo, përçarjen që po e shkakton kryeministri në detyrë, Albin Kurti, mes shqiptarëve jo vetëm në Kosovë, por edhe jashtë saj.
“Kryeministri në ikje i ka përçarë shumë shqiptarët e Maqedonisë Veriore, janë tepër keq. Le që këtu e ka prishur, ka mbërritur edhe atje”, thotë qytetarja në video.
Pas kësaj, Ismaili tha se gjatë takimeve që po i bën gjithandej Kosovës po dëgjon shqetësime të ngjashme, duke shtuar se kjo situatë duhet të marrë fund.
“Kudo që shkoj nëpër Kosovë e dëgjoj të njëjtën fjalë, se si kryeministri në ikje me të vërtetë ndikon në përçarje mes nesh. Prandaj, më 7 qershor na duhet diçka tjetër, një kryeministër që na përbashkon dhe e ka vetëm një synim: si ta bëjë jetën tonë më të mirë”, u shpreh Ismaili.
Në postimin e tij, Ismaili shkroi se Kosovës i duhet një qasje që bashkon dhe jo që ndan njerëzit.
“Kosovës nuk i duhet një kryeministër që ndan njerëzit në të tanët e të tyre. Kosovës i duhet një kryeministër që përbashkon, dëgjon dhe punon për të gjithë. Kosovës i duhet Bedri Hamza!”, ka shkruar Ismaili.
The post Uran Ismaili ndan ankesën e qytetares: Kurti po shkakton përçarje mes qytetarëve (VIDEO) appeared first on Gazeta Express.
