Udhëheqësit botërorë po mbërrijnë në Evian të Francës për samitin tre-ditor të G7-ës, i cili zhvillohet në një moment të rëndësishëm diplomatik pas marrëveshjes kornizë mes SHBA-së dhe Iranit që hap një periudhë 60-ditore negociatash.
Presidenti amerikan, Donald Trump do t’u bashkohet udhëheqësve të Francës, Kanadasë, Gjermanisë, Italisë, Japonisë dhe Mbretërisë së Bashkuar.
Në samit marrin pjesë edhe krerët e Bashkimit Evropian, si dhe të ftuar si presidenti ukrainas Volodymyr Zelenskyy, kryeministri indian Narendra Modi, presidenti brazilian Luiz Inacio Lula da Silva dhe udhëheqës të tjerë nga Lindja e Mesme, Afrika dhe Azia, raporton Anadolu.
Samiti ka rëndësi të veçantë për presidentin francez Emmanuel Macron, i cili po e pret takimin dhe pritet të marrë pjesë për herë të fundit si president i Francës.
Takimet nisin të hënën me një takim dypalësh Macron–Trump, përpara një darke të fokusuar në atë që organizatorët e quajnë “sfida të mëdha ndërkombëtare”.
Të martën, diskutimet do të përqendrohen te Ukraina dhe Lindja e Mesme, ndërsa të mërkurën në ekonomi dhe inteligjencën artificiale, me pjesëmarrjen e drejtuesve të industrisë, përfshirë drejtorin ekzekutiv të OpenAI, Sam Altman.
Nënshkrimi i marrëveshjes SHBA-Iran mund të ndryshojë dinamikën e samitit për Trumpin, i cili ka pasur mosmarrëveshje me disa liderë evropianë për mungesën e konsultimeve para vendimit për të hyrë në luftë.
Shtëpia e Bardhë tha se Trump do të diskutojë çminimin e Ngushticës së Hormuzit, një hap i rëndësishëm për rikthimin e trafikut të tankerëve dhe besimit të transportit tregtar.
Të hënën, Macron tha se Franca ishte gati të vepronte “shumë shpejt” për të vendosur mjete, përfshirë anije pastrimi të minave, në rajon. Ai shtoi se një aeroplanmbajtëse franceze dhe grupi i saj shoqërues ndodhen tashmë në zonë dhe mund të angazhohen brenda pak ditësh pas nënshkrimit të marrëveshjes.
Macron ka ftuar gjithashtu Egjiptin, Katarin dhe Emiratet e Bashkuara Arabe në një sesion të veçantë mbi Lindjen e Mesme të martën, ku Irani pritet të jetë tema kryesore./teve1.info/
