Vera e karakterizuar nga valë të njëpasnjëshme të të nxehtit ka ndikuar ndjeshëm edhe në nivelet e ujërave nëntokësore.
Situata e thatësirës në Zvicër është përkeqësuar ndjeshëm, ndërsa vendi ka kaluar në nivelin më të lartë të alarmit për thatësirë. Temperaturat e larta dhe mungesa e reshjeve kanë bërë që lumenjtë të thahen, rezervat ujore të bien dhe sipërfaqe të gjelbra të digjen.
Sipas raportimeve të mediave zvicerane, periudha aktuale e thatë po cilësohet si historike, ndërsa pamjet nga pjesë të ndryshme të vendit tregojnë tokë të çarë dhe shtretër lumenjsh pothuajse pa ujë.
Vera e karakterizuar nga valë të njëpasnjëshme të të nxehtit ka ndikuar ndjeshëm edhe në nivelet e ujërave nëntokësore, transmeton albinfo.ch.
Pasojat janë të dukshme edhe në ekosisteme. Temperaturat e larta dhe nivelet e ulëta të ujit kanë shkaktuar ngordhjen e qindra mijëra peshqve, ndërsa situata ka ngritur shqetësime për furnizimin me ujë, bujqësinë dhe mjedisin.
Mbi 150 komuna me kufizime
Pavarësisht se Zvicra konsiderohet një vend i pasur me burime ujore, thatësira e këtij viti ka detyruar shumë autoritete lokale të ndërmarrin masa.
Të paktën 151 komuna zvicerane kanë vendosur kufizime në përdorimin e ujit gjatë kësaj vere. Në disa prej tyre, banorëve u është ndaluar ose kufizuar mbushja e pishinave dhe ujitja e kopshteve.
Situata është pasojë e një kombinimi të reshjeve të pakta dhe temperaturave të larta. Pranvera e vitit 2026 ishte gjithashtu ndër më të thatat të regjistruara në Zvicër që nga fillimi i matjeve sistematike në vitin 1864.
Autoritetet federale kanë në dispozicion një sistem kombëtar për monitorimin dhe paralajmërimin e thatësirës, i cili kombinon të dhëna meteorologjike, hidrologjike dhe satelitore për të vlerësuar zhvillimin e situatës në të gjithë vendin.
Thatësirat gjithnjë e më të shpeshta përbëjnë sfidë jo vetëm për furnizimin me ujë, por edhe për bujqësinë, prodhimin e energjisë dhe ekosistemet në Zvicër.
The post Thatësira në Zvicër arrin nivel kritik, lumenjtë po thahen dhe kullotat po digjen appeared first on Gazeta Express.
