Një person është plagosur me armë zjarri mbrëmjen e 15 gushtit në Prishtinë, ndërsa dy të dyshuar kanë ikur nga vendi i ngjarjes dhe ndodhen ende në arrati.
Sipas Policisë së Kosovës, rasti ka ndodhur rreth orës 22:00 në rrugën “Sheshi i Arbrit”, ku është raportuar për të shtëna me armë zjarri.
“Është raportuar për të shtëna me armë zjarri, ku njësiti policor në vendin e ngjarjes kanë hasur viktimën m/k, i cili ishte i plagosur me armë zjarri”, thuhet në raportin policor.
Viktima është dërguar për trajtim mjekësor në Qendrën Klinike Universitare të Kosovës (QKUK).
Sipas Policisë, të dyshuar për rastin janë dy meshkuj kosovarë, të cilët kanë ikur nga vendi i ngjarjes dhe vazhdojnë të jenë në arrati.
“Rasti është duke u hetuar nga njësitet kompetente policore”, thuhet në raport.
