Gjatë udhëtimit ajror, veçanërisht në fluturimet me distanca të gjata, pozicioni në të cilin ulen pasagjerët mund të ketë një ndikim të rëndësishëm në shëndetin dhe rehatinë e tyre.
Stjuardesa Barbiebac La Azafata i paralajmëroi pasagjerët se të ulesh këmbëkryq gjatë një fluturimi mund të jetë e rrezikshme, pasi mund të ngadalësojë qarkullimin e gjakut dhe të rrisë mundësinë e formimit të mpiksjeve të gjakut në këmbë. Ajo thekson se ky pozicion është veçanërisht problematik në fluturimet e gjata, kur trupi është në të njëjtin pozicion për një kohë të gjatë.
Përveç shmangies së këmbëve të kryqëzuara, ajo ndau edhe një numër këshillash për një udhëtim më të rehatshëm, duke theksuar se shumë udhëtarë marrin pozicione të pasakta që më vonë shkaktojnë dhimbje.
“Mos i mbani këmbët e kryqëzuara për periudha të gjata kohore. Kjo mund të ndërhyjë në qarkullimin e gjakut dhe në fluturime të gjata jeni në rrezik më të lartë për trombozë. Ndërroni shpesh pozicionin. Mos i vendosni këmbët në sediljen përpara jush. Është shumë johigjienike dhe tregon mungesë respekti ndaj pasagjerëve të tjerë”, shpjegoi ajo.
Ajo paralajmëroi gjithashtu se të flesh mbështetur në dritaren e një aeroplani mund të shkaktojë shqetësim, duke përfshirë dhimbje koke për shkak të dridhjeve, dhe theksoi se sipërfaqet e dritareve nuk janë gjithmonë ideale nga ana higjienike.
“Dridhjet e aeroplanit mund t’ju shkaktojnë dhimbje koke, dhe dritarja është gjithashtu shumë e ndotur nga fytyrat e pasagjerëve të tjerë. Merrni një jastëk dhe mos e ulni sediljen gjatë gjithë fluturimit. Kjo mund ta shqetësojë pasagjerin pas jush”, tha ajo.
Ish-stjuardesa Sherry Peters, e cila ka 27 vjet përvojë, ndau gjithashtu këshilla për një fluturim më të rehatshëm. Ajo rekomandon një vend pranë dritares për pasagjerët që duan një pushim më të qetë gjatë fluturimit.
“Një vend pranë dritares të jep shumë më tepër kontroll, gjë që është çelësi për të fjetur. Mund të mbyllësh perdet, të mbështetesh në murin e aeroplanit dhe të shmangësh goditjet me bërryl nga njerëzit që ecin në korridor”, shpjegoi ajo.
Ajo gjithashtu këshilloi shmangien e vendeve pranë kuzhinës dhe tualeteve, pasi, siç pohon ajo, këto janë vendet më të pakëndshme për të pushuar për shkak të lëvizjes së vazhdueshme të pasagjerëve dhe ekuipazhit të kabinës
