Zvicra ka nisur nga 2 nëntori 2026 lëshimin e kartave të reja biometrike të identitetit, të cilat përmbajnë një çip elektronik me fotografinë e fytyrës dhe dy gjurmët e gishtërinjve.
Dokumenti i ri synon të rrisë sigurinë dhe të jetë në përputhje me standardet evropiane, ndërsa qytetarët mund të zgjedhin nëse duan kartën e re me çip apo versionin tradicional.
Sipas njoftimit të Policisë Federale të Zvicrës (fedpol), kartat e reja janë të disponueshme nga 2 nëntori dhe mund të aplikohen në zyrat kantonale për pasaporta dhe dokumente identifikimi, si dhe në përfaqësitë zvicerane jashtë vendit.
Aplikimi mund të bëhet edhe online, por paraqitja personale mbetet e detyrueshme për regjistrimin e të dhënave biometrike, transmeton Telegrafi.
Çipi elektronik përmban fotografinë e fytyrës dhe dy gjurmët e gishtërinjve, duke e bërë dokumentin më të mbrojtur nga falsifikimi dhe manipulimi. Sipas autoriteteve zvicerane, karta e re është veçanërisht e përshtatshme për udhëtimet në vendet e Bashkimit Evropian, pasi mund të lexohet dhe verifikohet edhe në mënyrë elektronike.
Një nga veçoritë e këtij ndryshimi është se qytetarët nuk janë të detyruar ta zëvendësojnë kartën aktuale. Dokumentet e identitetit pa çip, të lëshuara deri më tani, mbeten të vlefshme deri në datën e skadimit dhe mund të përdoren për identifikim në Zvicër dhe udhëtime në BE.
Po ashtu, autoritetet kanë bërë të ditur se çmimi i kartës së re biometrike mbetet i njëjtë me atë të kartës së mëparshme pa çip. Qytetarët mund ta porosisin edhe në të njëjtën kohë me pasaportën zvicerane.
Ndryshimi prek edhe dokumentet e përkohshme të udhëtimit. Nga 2 nëntori, pasaporta e përkohshme në Zvicër merr emërtimin e ri “Notpass”, ndërsa ndryshojnë edhe dizajni dhe elementet e sigurisë. Procedurat e aplikimit dhe kushtet për marrjen e saj mbeten të njëjta.
Autoritetet theksojnë se karta e re biometrike nuk duhet ngatërruar me identitetin elektronik (E-ID), pasi bëhet fjalë për një dokument fizik identifikimi dhe udhëtimi, ndërsa E-ID shërben për identifikim në shërbimet digjitale./Telegrafi/
