Presidenti ukrainas, Volodymyr Zelenskyy, ka deklaruar se Ukraina do të vazhdojë sulmet ndaj rafinerive të naftës në Rusi, si kundërpërgjigje ndaj sulmeve ruse në infrastrukturën energjetike të vendit.
“Operacioni kundër rafinerive ruse të naftës vazhdon, në hakmarrje për sulmet ruse në infrastrukturën energjetike të Ukrainës”, ka theksuar Zelenskyy në një postim në platformën X.
Ai ka bërë të ditur se Rusia po vazhdon të godasë objektet jetike në Ukrainë, përfshirë centralet elektrike, rrjetet e energjisë, infrastrukturën e ngrohjes, objektet e furnizimit me ujë dhe zinxhirët e furnizimit civil.
“Rusët nuk po e ndryshojnë natyrën e veprimeve të tyre agresive. Ata kanë refuzuar të ndërmarrin hapa për uljen e tensioneve që partnerët tanë kanë kërkuar dhe po planifikojnë sulme të mëtejshme”, ka shtuar ai.
Në fund, presidenti ukrainas ka theksuar se presioni ndaj Moskës duhet të vazhdojë, me qëllim që Rusia të angazhohet në negociata kuptimplota për përfundimin e luftës.
Sinjali – aty ku e vërteta flet para lajmit!
Burimi: Sinjali
