Udhëheqësit evropianë kanë kundërshtuar propozimin e presidentit amerikan Donald Trump për një marrëveshje të gjerë sigurie me Rusinë, e cila do të përfshinte jo vetëm Ukrainën, por edhe gjithë Evropën. Zyrtarët evropianë kanë theksuar se asnjë marrëveshje që prek sigurinë e kontinentit nuk mund të arrihet pa përfshirjen e tyre, raporton Euronews.
Trump deklaroi të enjten se Uashingtoni mund të jetë pranë një marrëveshjeje gjithëpërfshirëse me Moskën, duke e përshkruar atë si një marrëveshje të madhe që mund të përfshijë gjithë Evropën.
“Do të jetë shumë e madhe. Do të përfshijë më shumë sesa Ukrainën dhe mund të them madje se mund të përfshijë gjithë Evropën. Do të jetë një marrëveshje e madhe, e bukur dhe të gjithë do të jenë të kënaqur”, tha Trump, pa dhënë detaje të tjera.
Sipas Euronews, deklaratat e tij kanë ngritur shqetësime te aleatët evropianë të Uashingtonit se administrata amerikane mund të jetë duke shqyrtuar një marrëveshje sigurie që merr parasysh kërkesat e kahershme të presidentit rus Vladimir Putin, në dëm të interesave evropiane.
Shefja e politikës së jashtme të Bashkimit Evropian, Kaja Kallas, ka kundërshtuar një marrëveshje të tillë, duke theksuar se Evropa tashmë ka një arkitekturë të sigurisë.
“Ne tashmë kemi një arkitekturë evropiane të sigurisë. Problemi mbetet se Rusia vazhdon t’i shkelë traktatet mbi të cilat mbështetet kjo arkitekturë. NATO nuk përbënte kërcënim për Rusinë në vitin 2021 dhe nuk përbën kërcënim as tani. Putini nuk ka të drejtë vetoje mbi sigurinë evropiane”, tha Kallas në Varshavë.
Ajo theksoi se Bashkimi Evropian duhet të përfshihet në çdo marrëveshje që synon të zbatohet.
Edhe ministri i Jashtëm polak, Radoslaw Sikorski, paralajmëroi se çdo marrëveshje për të ardhmen e Ukrainës dhe Evropës, e arritur pa pjesëmarrjen e vendeve evropiane, do të ishte politikisht e papranueshme dhe praktikisht e pamundur.
“Një marrëveshje për të ardhmen e Ukrainës dhe Evropës, e arritur pa dijeninë dhe pjesëmarrjen tonë, jo vetëm që do të ishte e pamatur, por është në fakt e pamundur”, deklaroi Sikorski.
Ndërkohë, ministri i Jashtëm ukrainas, Andriy Sybiha, tha se Rusia nuk mund të konsiderohet garantuese e sigurisë evropiane.
“Duhet të flasim për mbrojtjen tonë nga Rusia, jo të bisedojmë me rusët për sferat e ndikimit në Evropë”, tha Sybiha.
Sipas Euronews, kundërshtimet evropiane vijnë në kohën kur administrata Trump po intensifikon përpjekjet për t’i dhënë fund luftës në Ukrainë, ndërsa përfaqësuesit amerikanë po përgatiten për rifillimin e negociatave ndërmjet Kievit dhe Moskës në Abu Dhabi javën e ardhshme.
I dërguari i posaçëm i Trumpit, Jared Kushner, ka bërë të ditur se Uashingtoni po punon për një kornizë më të gjerë të sigurisë evropiane, me qëllim krijimin e kushteve për një paqe të qëndrueshme.
Ai ka theksuar se Shtetet e Bashkuara synojnë të konsultohen ngushtë me partnerët evropianë dhe, nëse arrihet përparim në negociata, të kalohet drejt një formati më të gjerë shumëpalësh.
Ndërkaq, zëdhënësja kryesore e Komisionit Evropian, Paula Pinho, ka deklaruar se mbetet ende shumë punë përpara arritjes së një marrëveshjeje paqeje, duke theksuar se Bashkimi Evropian do të vendosë vetë për çështjet e sigurisë së tij.
Sipas Euronews, qëndrimet e palëve mbeten të ndryshme. Ukraina kërkon garanci të besueshme kundër një agresioni të ardhshëm rus, ndërsa Moska prej kohësh ka kërkuar kufizime të pranisë dhe ndikimit të NATO-s në Evropën Lindore.
Nga ana tjetër, qeveritë evropiane kundërshtojnë çdo marrëveshje që mund të dobësojë NATO-n, të cenojë marrëveshjet ekzistuese të sigurisë ose të kufizojë sovranitetin e shteteve evropiane.
Burimi: RTKLive
