Të rritesh me prindër që i marrin personalisht kritikat dhe reagojnë keq ndaj çdo kundërshtimi mund të ndikojë në mënyrën se si fëmijët sillen edhe në moshë madhore.

Edhe pasi bëhen të pavarur, ata mund të vazhdojnë të përballen me pasiguri, frikë nga konfliktet dhe nevojën për të kënaqur të tjerët. Disa nga këto sjellje mund të shfaqen në jetën e përditshme, shpesh pa e kuptuar se lidhen me përvojat e fëmijërisë, shkruan YourTango.

1. Shpjegojnë çdo vendim në detaje

Ata ndiejnë nevojën të justifikojnë vazhdimisht zgjedhjet e tyre, edhe kur askush nuk ua kërkon. Kjo ndodh sepse janë mësuar që në fëmijëri të tregohen të kujdesshëm ndaj reagimeve të prindërve dhe të shmangin çdo mundësi konflikti.

2. Kërkojnë miratimin e të tjerëve

Edhe për vendime të vogla, kanë nevojë të konsultohen me dikë tjetër. E kanë të vështirë t’i besojnë gjykimit të tyre dhe shpesh kërkojnë konfirmim përpara se të veprojnë, pasi janë mësuar të vlerësojnë çdo zgjedhje përmes reagimit të prindërve.

3. Kërkojnë falje edhe kur nuk kanë faj

Ata shpesh marrin përgjegjësi për gabimet e të tjerëve dhe kërkojnë falje për situata që nuk i kanë shkaktuar vetë. Ky zakon mund të krijohet që në fëmijëri, kur marrja e fajit ishte mënyra më e lehtë për të shmangur debatet dhe tensionet në familje.

4. E ndëshkojnë veten për çdo gabim

Në vend që t’i shohin gabimet si pjesë normale të jetës, tregohen tepër të ashpër me veten. Psikologu Guy Winch shpjegon se vetëkritika dhe ndëshkimi i vetes mund të shërbejnë si një mënyrë për të lehtësuar ndjenjën e fajit dhe për të rifituar qetësinë emocionale.

5. Shmangin shprehjen e mendimit të tyre

Të rriturit në familje ku kundërshtimet shkaktonin reagime negative, shpesh mësojnë të heshtin për të ruajtur paqen. Edhe në moshë madhore, mund ta kenë të vështirë të shprehin hapur mendimet dhe ndjenjat, nga frika se mos shkaktojnë konflikt.

6. Përpiqen t’i bëjnë të gjithë të lumtur

Ata ndihen përgjegjës për humorin dhe mirëqenien emocionale të njerëzve përreth. Terapistja Sarah Epstein shpjegon se në disa raste, fëmijët marrin përsipër përgjegjësi emocionale që u takojnë prindërve, duke shtypur nevojat e tyre për të ruajtur qetësinë në shtëpi. Ky model mund të vazhdojë edhe në marrëdhëniet e tyre si të rritur.

7. Përgatitin paraprakisht çdo bisedë

Përpara një bisede të rëndësishme, ata mendojnë gjatë se çfarë do të thonë dhe si mund të reagojë personi tjetër. Madje përgatitin përgjigje për pyetje që mund të mos bëhen kurrë. Kjo sjellje lidhet me frikën nga reagimet negative dhe nevojën për të pasur gjithçka nën kontroll.

8. E kanë të vështirë të pushojnë

Edhe kur janë të lodhur, vazhdojnë ta shtyjnë veten dhe e kanë të vështirë të ndalen. Mund të ndihen sikur duhet të jenë gjithmonë produktivë, të mos shfaqin dobësi dhe të mos krijojnë probleme për të tjerët. Si pasojë, shpesh lënë pas dore nevojat e tyre dhe e kanë të vështirë të gjejnë qetësi. /Telegrafi/